«Meniń atym Qoja» kórkem fılminiń kórsetilimi Býdapeshtte ótti.
Qazaq dıasporasynyń ókilderi jáne Vengrıada bilim alyp jatqan qazaqstandyq stýdentter túrli qyzyq oqıǵaǵa tap bolatyn izdenimpaz, meıirimdi, minezi ashyq 12 jasar bala týraly kınokartınany joǵary baǵalady, dep habarlaıdy Almaty-aksamy.kz.
Qazaq jastary bas qosyp, osyndaı ıgi sharalardy jıi ótkizýdi josparlap otyr. Elshiliktiń málimeti boıynsha, Qazaqstannyń 800-ge jýyq azamaty Vengrıanyń úzdik joǵary oqý oryndarynda bilimin jetildirýde.
«Qazirgi zamanda shetelde júrgen qazaq jastary úshin osyndaı sharanyń bolǵany mańyzdy. Qazaqtyń ádet-ǵurpy men mádenıeti, tili men áni, salt-sanasyn shette júrgen qazaq jastary saǵynady. Sondyqtan úlgi, sabaq bolatyn otandyq dúnıelerdi kórsetken jón», - deıdi Vengrıadaǵy «Abaı» mádenı ortalyǵynyń tóraıymy Ońaısha Mandókı.
«Sheteldegi qazaq stýdentter otandyq fılmderdi kórý úshin jınalyp, tanysyp, bir-birimizben qarym-qatynasymyzdy jaqsartamyz. Ana tilimizde sóılesip, óz mádenıetimizdi eske alyp jáne ony jańǵyrtamyz dep oılaımyn», - deıdi stýdent Malıka Saǵynaeva.