Túrkıalyq ǵalym, memleket jáne qoǵam qaıratkeri Ibrahım Kalynnyń tanymal eńbegi qazaq tilinde jaryq kórdi dep habarlaıdy almaty-aqshamy.kz.
Túrik dúnıesine aty belgili avtordyń Islam men Batystyń qarym-qatynas tarıhyna sholý jasaǵan «Men, ózge jáne ózgesi» atty eńbegi qazaqstandyq oqyrmandarǵa jol tartty.
Atalǵan kitaptyń tanystyrylymy búgin, 30 qarasha kúni Almatydaǵy «Qazaqstan» qonaqúıinde ótti. Oǵan Qazaqstan men Túrkıanyń dıplomattary, ǵalymdar men zertteýshileri, zıaly qaýym ókilderi jáne BAQ ókilderi qatysty. Qatarynda Túrkıa Respýblıkasynyń Almaty qalasyndaǵy Bas konsýly Evren Múdderısoǵlý, Q.A.Iassaýı ýnıversteti Ókiletti keńesiniń tóraǵasy Muhıttın Shimshek, Eýrazıa Ǵylymı-zertteý ınıstıtýtynyń dırektory Sýat Beı
Doktor ári profesor I.Kalynnyń bul eńbegi Islam men Batys álemniń 14 ǵasyrlyq ózara qarym-qatynasyna sholý jasaı otyryp, bir-birine yqpal etýshi eki álemde qalyptasqan kózqarastardy baǵalaýǵa baǵyttalǵan. Bylaısha aıtqanda únemi kereǵar, bir-birin «joqqa shyǵarýshy» sanalatyn eki keńistiktiń shyn máninde uzaq tarıh boıynda udaıy áserlesip, bir tarap kelesi taraptyń ózin tanýyna yqpal etip otyrǵanyn senimdi dáleldermen túsindirýge tyrysqan.
Kitaptyń tanystyrylymy kezinde avtor Túrkıadan vıdeo-sálemdeme joldady. Onda óz eńbegin qazaq oqyrmandaryna jetkizýge eńbek etken ǵylym ordasyna rahmet aıtty. Sondaı-aq, eýrosentrıstik kózqarastan ada turyp, Islam men Batys órkenıetiniń tarıhyna jańa kózqaras ornatýǵa bolatynyn osy kitap arqyly qazaq oqyrmandaryna jetkizgisi keletinin aıtty.
Atalmysh aýqymdy ǵylymı eńbekti qazaq tildi aýdıtorıaǵa jetkizýge sebep bolǵan Q.A.Iassaýı atyndaǵy HQTÝ-ne qarasty Eýrazıa Ǵylymı-zertteý ınstıtýty ekenin aıryqsha ataı ketken jón. Atalǵan ǵylym ordasy buǵan deıin de dál osyndaı aýqymdy ári salmaqty eńbekterdi qazaq tiline aýdaryp keledi. I.Kalynnyń bul eńbegi ınstıtýt tarabynan shyǵarylǵan 38-shi kitap boldy.
600 betten asatyn, 10 taraýdan turatyn ǵylymı eńbekti qazaq tiline aýdarǵan atalǵan ınstıtýtynyń aǵa ǵylymı qyzmetkeri Ómirbek Qanaı. Tanystyrylym kezinde ol kitapty qazaq tildi ǵylymı ortaǵa barynsha túsinikti jetkizýge kúsh salǵanyn, ári orys tiliniń áserinde burmalanyp júrgen ǵylymı ataýlardy barynsha túp nusqasynda berýge tyrysqanyn jetkizdi. Ó.Qanaı kólemdi eńbekte qamtylǵan taqyryptardyń ár alýandylyǵyna baılanysty keıde ádebı aýdarma jasaýǵa týra kelgenin, sondyqtan ondaǵy baıyrǵy jyr-dastandardy qazaqtyń poezıa tilinde jetkizýge kúsh salǵanyn da aıtady.
Ibrahım Kalyn – túrik ǵalymy, memleket jáne qoǵam qaıratkeri, dıplomat. Islam tarıhy, Batys pen Islam álemi qarym-qatynasy, Túrkıanyń syrtqy saıasatyna qatysty birqatar ǵylymı eńbekterdiń avtory. Túrkıa Respýblıkasy Prezıdentiniń resmı ókili, Prezıdent janyndaǵy Qaýipsizdik jáne syrtqy saıasat komıteti tóraǵasynyń orynbasary jáne Prezıdenttiń Bas keńesshisi tóraǵasynyń orynbasary syndy birqatar laýazymdy qyzmetter atqarǵan. Bıyl mamyr aıynan bastap Túrkıanyń Ulttyq barlaý qyzmetiniń basshysy qyzmetin atqaryp keledi.