Adam denesindegi meń men qaldyń teride qaterli isik týdyratyn túrleri bar.
Onkolog dárigerler osylaı deıdi. Ádette keı adam denesindegi qal nemese meńdi tabıǵı erekshelik dep, mán bermeıdi. Tipti ony densaýlyǵyna qaýipsiz dep oılaıdy. Alaıda denedegi óskinniń túr-túsine mán bergen jón, dep habarlaıdy Almaty-akshamy.kz 24.kz-ke silteme jasap.
Ǵalymdar adam terisinde bolatyn meń men qaldyń 300-den astam túrin anyqtaǵan. Onyń biri týabitti, biri júre paıda bolady. Biraq osy ósindiler men teridegi daqtardyń ishinde ómirge qaýip tóndiretinderi de bar. Solardyń biri - melanoma. Sondyqtan qazir teri melanomasyn anyqtaý jáne emdeý onkologıanyń kúrdeli máseleleriniń birine aınalǵan. Jas ulǵaıǵan saıyn adamnyń meńi aqyryn ósedi, azdap formasy ózgeredi. Óńi de dene túsindeı bolýy múmkin. Bul qalypty jaǵdaı. Al úlkeıip, betki qabaty qaraıa tússe, beti qyshyp, aýyrsynsa, oǵan beıjaı qaraýǵa bolmaıdy. Ondaıda dárigerge qaralǵan durys. Onyń sońy aýyr jaǵdaıǵa ulasýy múmkin.
«Eń birinshi, mamanǵa barý kerek. Dermatolog nemese onkologtyń keńesin alyp, sodan keıin qaýipti emes dese ǵana alýǵa bolady. Eger kosmetologıalyq salonǵa baryp alǵyzǵysy kelse, mindetti túrde dárigermen keńesip alý kerek. Melanoma men bazalema - teriniń qaýipti aýrýlary. Óte jaman, 1-3 mm bolyp eki-úsh aıda metastaza berýi múmkin», - deıdi onkolog dáriger Sáken Sábirbekov.
Aýrýdy ýaqytynda anyqtaý mańyzdy. Mundaıda ózin-ózi tekserý ádisi kómektesedi. Aınaǵa qarap, teridegi barlyq qara, qyzyl, kók nemese qońyrqaı meńderdi, daqtardy, túıinderdi tekserińiz. Qaýipti meń men daqtyń shetteri birkelki bolmaıdy. Sondaı-aq denesinde meńi kóp adam kún sáýlesinen saqtanýy kerek, deıdi mamandar. Sebebi óskinderi bar adamdardyń melanomaǵa shaldyǵý qaýpi bar.