Tuńǵysh Prezıdent kúni men el Táýelsizdiginiń 30 jyldyǵy aıasynda Ál-Farabı atyndaǵy Qazaq ulttyq ýnıversıtetinde «Men jastarǵa senemin!» atty respýblıkalyq patrıot jastardyń forýmy ótti.
Atalmysh is-sharanyń basty maqsaty – ınovasıa men shyǵarmashylyqty ushtastyrý arqyly jastar patrıotızmin damytý.
Forým jumysyna Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev, Ulttyq kınony qoldaý memlekettik ortalyǵynyń basqarma tóraǵasy Esetjan Qosýbaev, Almaty oblysy Aqsý aýdany Qapal aýyldyq okrýgi ákimi apparatynyń bas mamany Vladımır Chepel, QR Mádenıet salasynyń úzdigi, aqyn Baqyt Jaǵyparuly jáne forým jeńimpazdary men stýdentter qatysty.
Ýnıversıtet rektory Janseıit Túımebaev barlyq forýmǵa qatysýshylardy quttyqtap, ystyq lebizin bildirdi.
– Qazaqstan – daryndy jastar mekeni. Bizdiń elimizde jastardyń alańsyz oqyp, bilim alýyna, shyǵarmashylyqpen aınalysyp, qalaǵan mamandyq ıesi atanýyna barlyq jaǵdaı jasalǵan. Qazaqstannyń bolashaǵy eń aldymen sizderge, sizderdiń bilimderińizge, energıalaryńyz ben patrıotızmderińizge baılanysty. Táýelsiz elimizdiń maqtanyshyna aınalyp, ómirdiń barlyq salalarynda úlken jetistikterge jetýlerińizge shyn júrekten tilektespin! – dedi ol.
Respýblıkalyq forýmǵa elimizdiń barlyq óńirlerinen 2000-ǵa jýyq jumys qabyldansa, olardyń 107-si marapat keshine joldama alyp otyr. Bıyl forýmǵa qatysýshylar esse jazý, ınovasıalyq joba, kórkem sóz oqý, beınerolık daıyndaý, azamattyq-patrıottyq baǵyttaǵy poezıalyq shyǵarma jazý, sybaılas jemqorlyqqa qarsy joba men sýret óneri sıaqty segiz baǵyt boıynsha baq synasty.
Gala-konsert barysynda ár nomınasıa boıynsha jeńiske jetken gran-prı ıegerlerine bir jyldyq grant sertıfıkaty tabystaldy. Sonymen qatar sharada birinshi, ekinshi jáne úshinshi oryn ıegerleri de marapattaldy. Shara sońy konserttik baǵdarlamaǵa ulasty.