Áleýmettik jelide Túrkistan qalasyndaǵy 2021 jyly paıdalanýǵa berilgen Kerýen saraı kesheninde sándi dekoratıvtiń jelmen domalap bara jatqan vıdeosy taraýda. Ony ǵalamtorǵa júktegender ony «Baýyrsaq» ertegisindegi «baýyrsaqqa» teńegen.
Bul jaǵdaıǵa baılanysty Túrkistan oblysy ákimdiginiń baspasóz qyzmeti túsinikteme berdi. Bul shar ınvestorlardyń esebinen salynǵan, dep habarlaıdy Almaty-akshamy.kz Astanatv.kz-ke silteme jasap.
«Aqparatta kórsetilgen oqıǵa 28 jeltoqsan kúni Túrkistan qalasyndaǵy Kerýen saraı kesheninde bolǵan. Qatty jeldiń saldarynan sándik (dekoratıvti) shardyń biri úzilip, sý baseınine túsken. Shardyń salmaǵy 5 keliden aspaıtyn, jeńil bolýy sebepti jeldiń ekpinimen qozǵalyp úzilgenin jáne bul keleńsizdikten eshkim zardap shekpegenin habarlaımyz. Qazirgi tańda shar belgilengen ornyna qaıta bekitilip, qalpyna keltirildi», - delingen jaýap berildi.
Túrkistan qalasynda aýa raıy jaıly bolatyny belgili. Degenmen, aýa raıynyń tosyn minez tanytpasyna kepildik joq.
Áleýmettik jelide domalaǵan shar qusap, taralyp jatqan bul vıdeonyń sońynda jazylǵan pikirlerdiń bir parasyn nazarlaryńyzǵa usynsaq:
«Búdjettiń aqshasy osylaı domalap kete beredi)», «1 mln teńge túsip qaldy», «Jaqsy ómirdi izdep ketken shyǵar...», «Qazaqstandaǵy azyq-túlik baǵasy sıaqty bul da erkin aınalymǵa ketti»,«Jemqorlyq. Sodan qashyp ketken ǵoı».