Áleýmettik ınspektorlar halyqtyń áleýmettik osal toptarynyń quqyqtaryn qorǵaý maqsatynda 223-ten astam tekserý júrgizdi
QR Áleýmettik kodeksiniń kúshine enýimen bıylǵy 1 shildede elimizde quzyretine múgedektigi bar adamdardy áleýmettik qorǵaý, arnaýly áleýmettik qyzmetter kórsetý jáne áleýmettik qamsyzdandyrý salasyndaǵy zańnamanyń saqtalýyn baqylaýdy júzege asyrý kiretin memlekettik áleýmettik qorǵaý ınspektorlary ınstıtýty engizildi. Osy kezeńde áleýmettik ınspektorlar 233 tekserý júrgizip, onyń 73-i profılaktıkalyq baqylaý sheńberinde, 160-y jospardan tys tekserýler boldy, dep habarlaıdy Almaty-akshamy.kz.
Memlekettik baqylaýmen: 49 mektep pen kolej, 36 jergilikti atqarýshy organdardyń oblystyq basqarmalary jáne aýdandyq bólimderi, 61 jumyspen qamtý basqarmalary men bólimderi, 13 dúken, 5 saýda ortalyǵy, 14 medısınalyq-áleýmettik mekeme, 20 emhana men aýrýhana, 2 bank bólimshesi, 3 qazposhta bólimshesi, 1 fıtnes-klýb, 1 ýnıversıtet, 4 sanatorıı, 2 kafe, 2 shashtaraz jáne t b qamtyldy.
«Máselen, Túrkistan oblysy boıynsha Eńbek jáne áleýmettik qorǵaý komıtetiniń departamenti Kentaý qalasy turǵynynyń (1 toptaǵy múgedektigi bar adam) ótinishi negizinde Kentaý gýmanıtarlyq-tehnıkalyq kolejine jospardan tys tekserý júrgizdi. Tekserý nátıjeleri boıynsha laýazymdy adamǵa anyqtalǵan zańbuzýshylyqtardy joıý týraly nusqama berildi, sondaı-aq ákimshilik jaýapkershilik sharalary qabyldandy», - dep habarlady Eńbek jáne halyqty áleýmettik qorǵaý mınıstrliginen.
Almaty oblysy boıynsha Eńbek jáne áleýmettik qorǵaý komıtetiniń departamenti Talǵar qalasy turǵynynyń ótinishi negizinde birqatar memlekettik mekemelerde: Talǵar qalasy ákiminiń apparatynda, Talǵar aýdany boıynsha Memlekettik kirister basqarmasynda, Talǵar aýdandyq polısıa basqarmasynda, Talǵar aýdandyq ortalyq aýrýhanasynda, «AMANAT» partıasy Talǵar aýdandyq fılıalynda jáne Talǵar aýdandyq elektr jelileri «Alataý jaryq kompanıasy» AQ-da jospardan tys tekserýler júrgizdi.
Tekserý nátıjeleri boıynsha jeke kásipkerge anyqtalǵan zańbuzýshylyqtardy joıý týraly nusqama berildi jáne ákimshilik jaýapkershilikke tartyldy.
«Sonymen qatar memlekettik áleýmettik ınspektorlar ınstıtýty engizilgenge deıin QR EHÁQM Eńbek jáne áleýmettik qorǵaý komıtetiniń aýmaqtyq departamentteri 2023 jyldyń 1 jartyjyldyǵynda 750 tekserý júrgizdi, anyqtalǵan zańbuzýshylyqtardy joıý týraly 533 uıǵarym berildi, 44 mln teńgeden astam somaǵa 233 aıyppul salyndy», - dedi vedomstvo ókilderi.
2023 jyldyń 1 shildesinen bastap áleýmettik ınspektorlardy engizý halyqtyń áleýmettik osal sanattarynyń quqyqtaryn ýaqtyly qorǵap qana qoımaı, múgedektigi bar adamdardyń ómir súrý sapasyn arttyrýǵa da yqpal etpek.