Kóbine memlekettik tapsyryspen kitap basylyp shyqty degendi estımiz. Alaıda sol qalaı irikteledi? Sol sátte kókeıdegi saýalǵa jaýap ala almaımyz. Mádenıet jáne aqparat mınıstrligi Kazinform saýalyna joldaǵan jaýapta memlekettik tapsyryspen basylyp shyǵatyn eńbekterdiń qalaı irikteletinin túsindirdi, dep habarlaıdy almaty-akshamy.kz.
«Eńbekterin memlekettik tapsyryspen basyp shyǵarý jáne taratý baǵytynda kelip túsken jeke jáne zańdy tulǵalardyń ótinimi 2021 jyly depýtattardyń usynysymen engizilgen Ulttyq memlekettik kitap palatasynyń ınternet-resýrsynda aldyn ala irikteý boıynsha onlaın-platformaǵa oqyrmandar daýys berý úshin júkteledi. Bul júıeniń tıimdiligi - Qazaqstannyń árbir azamaty memlekettik tapsyrys boıynsha basylyp shyǵatyn shyǵarmalardy irikteýge qatysýǵa múmkindik alady. Bul óz kezeginde qoǵamnyń otandyq ádebıetke degen suranysyn, shyǵarmalar janryn, oqyrmandardyń jas sanattaryn taldaýǵa, sondaı-aq shyǵarma avtorlarynyń tanymal bolýyna múmkindik beredi», - dep jazylǵan vedomstvo málimetinde.
Degenmen oqyrman qaýymnyń bergen daýysy irikteýde sheshýshi ról atqarmaıdy.
Memlekettik tapsyryspen basylatyn eńbekterdi úsh kezeńde úsh túrli komısıa anyqtaıdy.
«Budan keıin oqyrmandar daýysyn eskere otyryp, Kitap palatasy janynan qurylǵan táýelsiz komısıa (irikteýdiń birinshi kezeńi) qaraýyna usynylady. Táýelsiz komısıa avtorlyq týyndyny basyp shyǵarýǵa ótinimderdi aldyn ala irikteýdi qorytyndylaıdy. Táýelsiz komısıanyń qaraýynan ótken eńbekter shyǵarmanyń kórkemdik qundylyǵyn, ózektiligin, oryndylyǵyn, sondaı-aq olardy zerttep qorytyndy berý úshin saraptamalyq komısıaǵa (irikteýdiń ekinshi kezeńi) beriledi. Saraptama komısıasynyń oń qorytyndysyn alǵan shyǵarmalar vedomstvoaralyq komısıanyń (irikteýdiń úshinshi kezeńi) qaraýyna engiziledi. Vedomstvoaralyq komısıanyń sheshimi qoǵamdyq mańyzy bar ádebıetterdi basyp shyǵarýǵa negiz bolyp tabylady. Osy rette irikteýdiń úsh kezeńinen oń qorytyndy alǵan ótinimder memlekettik tapsyryspen basylyp shyǵatyn ádebıetter tizimine engizilip, jyl sońyna deıin árqaısy 3 myń dana taralymda basylyp shyǵyp, kitaphanalarǵa taratylady. Kitaphanalar qory negizinen memlekettik tapsyryspen jaryq kórgen ádebıettermen tolyqtyrylyp otyrady», - dep túsindirdi mınıstrliktegiler.