Memlekettik rámizderdi qorlaǵandarǵa salynatyn aıyppul mólsherin 3 myń AEK-ke deıin ulǵaıtý máselesi pysyqtalyp jatyr.
Bul týraly Premer-Mınıstr Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy Almaty-almaty.kz
Aıta keteıik, Úkimet basshysyna depýtattyq saýal joldaǵan senatorlar memlekettik rámizderdi qorlaý boıynsha zań baptaryn barynsha qataıtýdy, belgilengen aıyppul mólsherin eki ese kóbeıtýdi jáne jaza merzimin 5 jylǵa deıin uzartýdy talap etken bolatyn.
«Qazir Qazaqstan Respýblıkasy Qylmystyq kodeksiniń «Memlekettik rámizderdi qorlaý» týraly 372-babynda kózdelgen jaýapkershilikti qatańdatýdy, sonyń ishinde eń joǵary aıyppuldy 2 000-nan 3 000 aılyq eseptik kórsetkishke deıin ulǵaıtý jáne qoǵamdyq jumystarǵa tartýdyń eń uzaq merzimin 600-den 900 saǵatqa deıin ulǵaıtý boıynsha túzetýlerdi múddeli memlekettik organdar pysyqtap jatyr», - delingen Álıhan Smaıylovtyń jaýabynda.