Almaty oblysy Talǵar aýdanynda ornalasqan qoqys polıgonynda Memlekettik rámizder tabyldy.
Qoqys arasynda jatqan birneshe Eltańba men Memlekettik týdyń beınejazbasy áleýmettik jelilerde tarady, dep habarlaıdy aqshamnews.kz.
Aýdan ákimdiginiń málimetine sáıkes, beınejazba Talǵar aýdanyna qarasty Qaınar aýyldyq okrýginiń Erkin aýylynyń aýmaǵynda ornalasqan qoqysta túsirilgen.
— Ákimdik qyzmetkerleri polıgon alańyn tekserdi. Tekserý kezinde atalǵan memlekettik rámizderdiń janynda bilim berý mekemesi — kolejdiń qujattary bar ekeni anyqtaldy. Basqa mán-jaılar anyqtalyp jatyr. Qazirgi ýaqytta polıgon ornynan Memlekettik rámizder alynyp tastaldy. Atalǵan Memlekettik rámizder Talǵar aýdanynyń memlekettik mekemelerine tıesili emes, — dep habarlady ákimdikten.
Al Almaty oblysynyń Polısıa departamenti Memlekettik rámizderdi qorlaý faktisi boıynsha polısıa qylmystyq is qozǵalǵanyn málimdedi.
— Talǵar aýdandyq polısıa qyzmetkerleri bolǵan oqıǵanyń barlyq mán-jaılaryn anyqtaý úshin qajetti jedel is-sharalar uıymdastyrdy. Kináli adamdarǵa qoldanystaǵy zańnamaǵa sáıkes tıisti sharalar qabyldanatyn bolady, — dep habarlady oblystyq PD baspasóz qyzmeti.