Almatyda Qazaqstan Qarýly kúshteriniń memlekettik qupıalardy qorǵaý salasyndaǵy mamandarynyń oqý-ádistemelik jıyny aıaqtaldy.
Úsh kúndik jıyn QR Qarýly kúshteri Bas shtaby memlekettik qupıalardy qorǵaý departamentiniń bastyǵy polkovnık Tımýr Sádýaqasovtyń basshylyǵymen Radıoelektronıka jáne baılanys áskerı-ınjenerlik ınstıtýtynyń bazasynda ótti, dep habarlaıdy almaty-akshamy.kz.
Jıynǵa qatysýshylardyń aldynda Qorǵanys mınıstriniń rejım boıynsha kómekshisi polkovnık Talǵat Ahmetov sóz sóıledi. Óz baıandamasynda ol áskerı maqsattaǵy aqparattandyrý obektilerindegi mańyzdy málimetterdi qorǵaý júıesin odan ári jetildirý jáne QR UQK ýákiletti organymen ózara tyǵyz is-qımyl jasaý jónindegi negizgi baǵyttardy jetkizdi.
– Jıyndar sheńberinde ofıserlerge kıberqaýipterdi tanýdyń jańa júıeleri, nysanaly shabýyldardyń analızatorlary, vırýsqa qarsy qaýipsizdik ortalyǵy, sondaı-aq tehnıkalyq barlaýǵa qarsy turýǵa múmkindik beretin aparattyq quraldar kórsetildi, – dedi Qazaqstan Qarýly kúshteri Bas shtaby Memlekettik qupıalardy qorǵaý departamenti Aqparattyq qaýipsizdik basqarmasynyń bastyǵy podpolkovnık Ǵalym Jaqsylyqov.
Jıynda áskerı qyzmetshilerdi dalalyq jaǵdaılarda arnaıy baılanys organdaryn óristetýge, qorǵalǵan jergilikti esepteý jelilerin qurýǵa jáne qupıa baılanys aparatýrasyn baqylaýǵa úıretý maqsatymen birqatar jumys núkteleri uıymdastyryldy.
Memlekettik qupıalardy qorǵaý qyzmeti bastyqtarynyń qatysýymen problemalyq máseleler men olardy sheshý joldary talqylandy.
2023 oqý jylyndaǵy jumys qorytyndysy shyǵarylyp, memlekettik qupıalardy qorǵaý salasyndaǵy úzdik mamandar anyqtaldy. Olardyń qatarynda maıorlar Baqytjan Súleımenov, Aleksandr Makedonskıı, kapıtan Dáýren Isakov, aǵa leıtenanttar Danıar Ahýnbaev, Symbat Amantaev, Madıar Úkenov jáne Ersultan Bolat bar.
