Parlament palatalarynyń birlesken otyrysynda depýtattar Úkimettiń 2022 jylǵy búdjet esebin talqylap jatyr, dep habarlaıdy Almaty-akshamy.kz.
Depýtat Anas Baqqojaev Úkimet basshysy Álıhan Smaıylovqa memlekettik qaryz boıynsha suraq qoıdy, dep jazdy Azattyq Ruhy.
«Álıhan Asqanuly, memlekettik boryshtyń kólemin azaıtý úshin qandaı sharalardy qoldanyp jatyrsyzdar? Sondaı-aq memlekettik boryshqa baılanysty ortasha jáne uzaq merzimdegi perspektıvalar boıynsha boljam qandaı?», - dedi ol.
Premer-mınıstr Álıhan Smaıylov memlekettik boryshty azaıtý máselesi Úkimettiń turaqty narazarynda ekenin aıtty.
«Osy saladaǵy jumys halyqaralyq tájirıbege sáıkes keledi. Qazir borysh qaýipsiz deńgeıinde qalyptasyp otyr. Ol jalpy ishki ónimniń 24,7% quraıdy. Memlekettik boryshty azaıtý jáne oǵan baılanysty búdjet shyǵystaryn azaıtý máselesin sheshý úshin Úkimet birqatar shara qabyldap jatyr. Birinshiden, respýblıkalyq búdjettiń tapshylyǵyn jalpy ishki ónimge 2,7%-dan kezeń-kezeńimen ári qaraı tómendetý. Ol jańa qaryzdardy alýǵa jáne shyǵystardyń ósýin shekteýge múmkindik beredi. Ekinshiden, búdjettiń óz kirisin ulǵaıtý. Ol úshin salyqtyq jáne kedendik ákimshilendirý jetildiriledi, sıfrlandyrý jalǵasady», - dedi Smaıylov.
Onyń aıtýynsha, ótken jyldyń qorytyndysy boıynsha respýblıkalyq búdjettiń óz kirisi 42% ósti.
«Bıylǵy ósim 40% bolady dep josparlap otyrmyz. Osyndaı joǵary qarqyndy ári qaraı qamtamasyz etýimiz kerek. Úshinshiden, qaryzdy negizinen ishki naryqtan teńgemen alýǵa basymdyq berip otyrmyz. Ol valútalyq táýekeldi azaıtýǵa múmkindik beredi. Tórtinshiden, memlekettik baǵaly qaǵazdardy halyqaralyq ındeksterge engizý. Sonyń negizinde halyqaralyq depozıtarıılerdi tartý. Ol bizge sheteldik ınvestorlardy keńinen ishki qor naryǵyna tartýǵa múmkindik beredi jáne qaryz alýdyń qunyn tómendetedi. Jalpy aldaǵy 5 jylda memlekettik borysh qaýipsiz deńgeıde qalyptasady. Jalpy ishki ónimniń 25%-nan aspaıdy dep boljap otyrmyz», - dedi Álıhan Smaıylov.