Qazaqstandyqtardyń kóńili qandaı salalarǵa tolmaıdy
Saýda jáne ıntegrasıa mınıstrligi tutynýshylardyń quqyǵyn qorǵaý komıtetiniń tóraǵasy Asqar Tynysbekov qazaqstandyqtar qanaǵattanbaıtyn salalar men onyń sebebin aıtyp berdi, dep habarlaıdy QazAqparat tilshisi.
«Qazaqstandyq tutynýshylar eń aldymen medısınalyq qyzmetterge (9,3%) qanaǵattanbaıtyn bolyp shyqty. Naqtyraq aıtqanda, medısınalyq personaldyń dórekiligi, uzynsonar kezek jáne sapasyz kórsetilgen medısınalyq qyzmetterge kóńili tolmaıdy. Ekinshi orynda - baılanys, onyń ishinde ınternet (33,3%). Iaǵnı abonenttik tólemaqyny zańsyz ósirý, sapasyz ınternet, sol sıaqty tarıftik jospardyń qunyn ulǵaıtý jáne ózgertýge qatysty», - dedi Asqar Tynysbekov ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, otandastarymyz qanaǵattanbaıtyn kelesi sala - qoǵamdyq kólik jumysy (30,7%).
«Atap aıtqanda, jolaýshy tasymaldaý erejesiniń buzylýy, personaldyń dórekiligi, jolaqysyn qolma-qol jáne onlaın esep aıyrysýdaǵy baǵa aıyrmashylyǵy. Kelesi - qoǵamdyq orynda tamaqtaný qyzmeti (24,4%). Ol jerde de dórekilik jáne sapaly qyzmet kórsetpeý, búlingen tamaq jáne sanıtarlyq-gıgıenalyq normalardyń saqtalmaýy», - deıdi ol.