Túrkistanda ótip jatqan Ulttyq quryltaıda Prezıdent Qasym-Jomart Toqaev memlekettik marapattar júıesin halyqtyń janyna jaqyn ári túsinikti etip jasaý kerektigin aıtty, dep habarlaıdy Almaty-akshamy.kz.
«Elimizde kúndelikti qajyrly eńbegimen memleketimizdi órkendetýge jáne azamattardyń qaýipsizdigin qamtamasyz etýge mol úles qosyp júrgen jandar az emes. Olardyń qatarynda muǵalim, dáriger, ǵalym, kásipker, tártip saqshysy, áskerı qyzmetshi, qutqarýshy jáne basqa da mamandyq ıeleri bar. Qoǵamǵa úlgi bolatyn osyndaı jasampaz ári otanshyl jandardy memleket árdaıym qoldaýǵa tıis.
Men ózim bul máselege aıryqsha mán beremin. Sol sebepti, árbir orden-medaldiń tereń maǵynaly ári erekshe bolýy, jurt kóńilinen shyǵatyndaı bolýy óte mańyzdy. Sol úshin memlekettik marapattar júıesin halyqtyń janyna jaqyn ári túsinikti etip jasaý qajet», - dedi Prezıdent.
Bul rette Memleket basshysy ulttyq ıdeologıany qalyptastyrý úshin tarıhı tulǵalardy júıeli dáripteýdi qolǵa alý kerektigin aıtty.
«Jýyrda biz memlekettik syılyqtarǵa halqymyzdyń birtýar perzentteriniń esimin berdik. Ál-Farabı, Abaı, Ahmet Baıtursynuly atyndaǵy syılyqtar bar. Mundaı ustanym uly tulǵalarymyzdyń esimin el jadynda saqtaý úshin qajet. Sol arqyly biz olardyń ozyq oılary men ónegeli isterin dáripteımiz. Shyn máninde, ulttyq ıdeologıa osyndaı mańyzdy sheshimder arqyly qalyptasady», - dep toqtaldy Memleket basshysy Qasym-Jomart Toqaev.