2023 jylǵy 21-22 jeltoqsanda «Qorǵas» shekara mańy yntymaqtastyǵy halyqaralyq ortalyǵynyń aýmaǵynda Qazaqstan Respýblıkasy men Qytaı Halyq Respýblıkasynyń shekara mańy keden organdary basshylarynyń kezdesýi ótti.
Talqylaýǵa shyǵarylǵan basym máselelerdiń biri ótkizý pýnktteriniń ótkizý qabiletin arttyrý boldy. Osy másele sheńberinde «Nur Joly – Qorǵas» ótkizý pýnktindegi táýlik boıǵy jumys rejımi, sondaı-aq «Maıqapshaǵaı-Zımunaı» jáne «Qaljat-Dýlaty» ótkizý pýnktterindegi 7 kúndik 12 saǵattyq jumys rejımi boıynsha pılottyq jobalarǵa baǵalaý júrgizildi, dep habarlaıdy almaty-akshamy.kz.
Taraptar osy ótkizý pýnktteri arqyly taýar aǵynynyń oń serpinin atap ótip, pılottyq jobalardy iske asyrýdy jalǵastyrýǵa kelisti.
Búgingi tańda shekaranyń Qazaqstan-Qytaı ýchaskesinde ornalasqan barlyq avtomobıl ótkizý pýnktteri 7/12 rejıminde, al «Nur Joly» ótkizý pýnkti táýlik boıy jumys isteıtinin atap ótemiz.
Sonymen qatar, kezdesý barysynda agroazyq-túlik ónimderi úshin «jasyl dálizdi» ilgeriletý jáne qazaqstandyq joǵary sapaly agroazyq-túlik ónimderiniń Qytaıǵa qoljetimdiligin ilgeriletý boıynsha yntymaqtastyq máseleleri talqylandy.
Qazaqstandyq delegasıany Qazaqstan Respýblıkasy Qarjy mınıstrligi Memlekettik kirister komıtetiniń baqylaý departamentiniń dırektory Saýdabaev Eldos basqardy.
Qytaı delegasıasyn Úrimshi keden basqarmasynyń bastyǵy Hao Vaımın basqardy.