Qazaqstandyq memlekettik-jekemenshik áriptestik ortalyǵy ornyqty damý men sıfrlandyrýǵa qosqan úlesi úshin halyqaralyq marapatqa ıe boldy
Qazaqstandyq memlekettik-jekemenshik áriptestik ortalyǵy (MJÁ) BUU Eýropalyq ekonomıkalyq komısıasynyń (BUU EEK) qoldaýymen Serbıa astanasy Belgrad qalasynda ótken İH Halyqaralyq MJÁ forýmynda halyqaralyq marapatqa ıe boldy. Halyqaralyq qazylar alqasy Ortalyqtyń ornyqty damý maqsattary men sıfrlyq transformasıa qaǵıdattaryna sáıkes keletin MJÁ jobalaryn ilgeriletýge qosqan úlesin joǵary baǵalady.
«Bul marapat – búkil kásibı ortanyń birlesken eńbeginiń nátıjesi. Qazaqstan MJÁ tetikterin halyqaralyq standarttarǵa saı jetildirýmen qatar, sıfrlyq tehnologıalardy tıimdi engizý arqyly salanyń sapaly damýyna jol ashyp otyr», – dedi «Qazaqstandyq memlekettik-jekemenshik áriptestik ortalyǵy» AQ Basqarma tóraǵasy Aslan Qalıǵazın.
Ortalyqtyń málimetinshe, 2006 jyldan beri elimizde jalpy 2,6 trln teńge somasyna 1100-den astam kelisimshart jasalǵan. Jobalardyń negizgi baǵyttary – bilim berý, densaýlyq saqtaý, energetıka jáne turǵyn úı-kommýnaldyq sharýashylyǵy bolyp tabylady. Bul rette rásimderdiń ashyqtyǵyna, sybaılas jemqorlyq táýekelderin azaıtýǵa jáne ınvestısıalyq tartymdylyqty arttyrýǵa basa nazar aýdarylyp otyr. Jobalardy konkýrstyq irikteý úshin veb-portal iske qosylyp, tikeleı kelissózder júrgizý tájirıbesine shekteý qoıyldy, MJÁ jáne konsesıalar týraly zańdar biriktirildi. Jobalardy júzege asyrý sany boıynsha Túrkistan, Shyǵys Qazaqstan jáne Atyraý oblystary kósh bastap tur.
MJÁ salasyndaǵy negizgi baǵyttardyń biri – áleýmettik ınfraqurylymdy damytý. 2023 jylǵy qarashada Úkimet 2024-2028 jyldarǵa arnalǵan MJÁ damytýdyń keshendi josparyn bekitti. Qujat bilim berý, densaýlyq saqtaý, sport jáne áleýmettik qorǵaý salalaryndaǵy 43 jobany qamtıdy.