Senat Tóraǵasy Máýlen Áshimbaev Nazarbaev Ýnıversıteti Joǵary memlekettik saıasat mektebiniń magıstratýra jáne doktorantýra túlekterine dıplom tapsyrý rásimine qatysty, dep habarlaıdy Almaty-akshamy.kz Inform.kz-ke silteme jasap.
Palata Spıkeri bıylǵy túlekter elimiz úshin eń jaýapty jáne mańyzdy kezeńde kásibı maman atanyp otyrǵandaryna nazar aýdardy.
«Konstıtýsıalyq reforma Jańa Qazaqstannyń negizi qalaıdy. Onda áleýmettik ádilettilik basty qundylyq bolyp sanalady. Birinshi kezekte, Jańa Qazaqstandy quratyn bizdiń jastarymyz ekeni anyq», – dedi Máýlen Áshimbaev.
Sondaı-aq Senat Spıkeri búgingi konstıtýsıalyq ózgerister aıasynda memlekettik apparattyń jumysyn da qaıta jandandyrýdyń mańyzdy ekenin aıtty.
«Qazir elimizdiń aldynda jańa mindetter tur. Onyń bári memlekettik apparattan jańa sapany talap etedi. Prezıdentimiz atap ótkendeı, bul jerde memlekettik basqarý modelin túbegeıli ózgertý máselesi sóz bolyp otyr. Sondyqtan memlekettik basqarýdyń tıimdiligin arttyrýǵa arnalǵan júıeli jumysty jalǵastyrǵan jón», – dedi Máýlen Áshimbaev.
Osyǵan oraı Senat Tóraǵasy búgingi memlekettik qyzmetshiniń boıynda bolýǵa tıis qasıetterge toqtaldy. Olardyń birinshisi – sananyń ashyqtyǵy jáne ınovasıalyq sheshimderge daıyn bolý.
«Qazirgi tańda memlekettik qyzmetshiler búrokratıany azaıtyp, naqty nátıjege basa mán berýge tıis. Kóbine bizdiń memlekettik qyzmette shuǵyl, qaýyrt, qarbalas jumys júrip jatsa da sońǵy nátıje kóńil kóńshitpeıdi. Sondyqtan bul salada naqty nátıje beretin jobalyq tásil mańyzdy ról atqarady», – dedi Máýlen Áshimbaev.
Sonymen qatar Senat Tóraǵasy memlekettik qyzmetshiler jaýapkershilikten qashpaý kerektigin aıtty. Onyń aıtýynsha, bul búginde osy saladaǵy kemshilikterdiń biri. Kóptegen memlekettik qyzmetshiler jaýapkershilikten qorqyp, sheshim qabyldaýdan qashqaqtap turady. Soǵan baılanysty azamattar men bızneske qatysty biraz másele sózbuıdaǵa salynyp, naqty sheshimin tappaı jatady. Osyǵan oraı memlekettik qyzmetshilerdi qorǵaýǵa arnalǵan quqyqtyq aktiler ázirleý máselesine de kóńil bólgen jón. Máýlen Áshimbaev ár maman únemi ózin ózi jetildirip, kásibı turǵydan shyńdalyp otyrýy kerektigin de tilge tıek etti.
«Búgingi memlekettik basqarýshylar tereń bilimdi bolýǵa tıis. Sondaı-aq olar synı oılap, tez sheshim qabyldaı bilýi kerek. Ujymmen, azamattarmen til tabysyp, júrgizilip jatqan saıasatty adamdarǵa anyq ári aıqyn túsindire alýy qajet. Munyń bári únemi óz qabiletińdi arttyryp otyrýdy talap etedi. Sondyqtan árdaıym izdenip, jańa nárseni tanýǵa, bilýge, úırenýge umtylǵan abzal. Sonymen birge memlekettik qyzmetshi qashanda adaldyq pen tártipke taban tireýge tıis», – degen Máýlen Áshimbaev túlekterge aldaǵy ómirde sáttilik tiledi.