Bank sektoryna qatysty ózgerister sóz boldy
Májilis depýtaty Aıqyn Qońyrov eldegi qarjy naryǵyn ońaltý úshin memlekettik bank qurýdy usyndy, dep habarlaıdy Almaty-akshamy.kz QazAqparat-qa silteme jasap.
Onyń paıymynsha, bul bank aýyl sharýashylyǵy, qurylys jáne ónerkásip salasyna mamandanǵan bolýy kerek.
«Qazaqstan halyq partıasynyń fraksıasy geosaıası sebepter men eldegi bank salasyn basqarýdaǵy álsizdikterdiń kesirinen bank daǵdarysy beleń alyp keledi dep esepteıdi. Dúnıejúzilik saýda uıymyna kirgenimizge qaramastan, reseılik bankterden basqa iri bankter Qazaqstanda jumys isteýge kirgen joq. Qazirgi sanksıalarǵa da sol reseılik bankterdiń enshiles bankteri tap kelip jatyr. Keıingi bes jylda Qazaqstannyń bank salasynda olarǵa tıesili aktıvterdiń kólemi 15 paıyzǵa deıin ósti. Reseılik enshiles bankterdiń salymdarynyń kólemi 3 trln 500 mlrd teńgege deıin kóbeıdi», - dedi Aıqyn Qońyrov búgin Májilistiń jalpy otyrysynda.
Osyǵan oraı birqatar usynys aıtyldy.
«Biz jahandyq monetarlyq bılik ókilderi Reseı Federasıasynyń seriktes elderdiń qarjylyq sektoryna salatyn sanksıalardy qanshalyqty qataıtatynyn bilmeımiz. Qazaqstan osy sanatqa jatady. Osyǵan baılanysty Qazaqstan halyq partıasy bank sektoryn túbegeıli qaıta júkteýge úndeıdi. Salymshylardyń quqyqtary men zańdy múddelerin qorǵaý tásilin túbegeıli ózgertýdi usynamyz. Memlekettik baǵdarlamalar men Ulttyq jobalardy iske asyrý úshin memleket qarajatyn komersıalyq bankter men kvazımemlekettik ınstıtýtattar arqyly bólýden bas tartý qajet. Qazaqstanda agroónerkásip kesheni, qurylys jáne ónerkásip salalaryndaǵy memlekettik bank qurýdy usynamyz. Ol banktiń basym baǵyty valúta bırjasyndaǵy alypsatarlyq pen Ulttyq bank ishinde salym quıý emes, ekonomıkany damytý bolýǵa tıis», - dedi depýtat.