Mundaı qadam ınvestısıa tartý úshin jasalmaq.
Bul týraly búgin Úkimet otyrysynda QR Energetıka mınıstri Bolat Aqsholaqov aıtty, dep habarlaıdy Almaty-akshamy.kz QazAqparatqa silteme jasap.
«Jer qoınaýyn ıgerý jáne osy salaǵa ınvestısıa tartý boıynsha belsendi jumys júrip jatyr. Búgingi tańda kómirsýtekter men ýrandy barlaýǵa jáne óndirýge arnalǵan 304 kelisimshart bar. 2022 jyly jer qoınaýyn paıdalanýǵa salynǵan ınvestısıa somasy 5,9 trln teńgeni qurady. Ótken jyly aýksıonda 39 mlrd teńge qol qoıý bonýsy tólenip, 49 jer qoınaýy ýchaskesi berildi. Geologıalyq barlaýǵa málimdelgen ınvestısıa somasy shamamen 56 mlrd teńge boldy», - dedi Bolat Aqsholaqov.
Onyń atap ótýinshe, jer qoınaýyn paıdalanýshylar alǵan kelisimsharttyq mindettemelerdi oryndamaı uzaq ýaqyt ustaıtyn jer qoınaýy ýchaskelerin tekserý boıynsha jumys jalǵasyp jatyr.
«Munaı-gaz salasynda júıeli buzýshylyqtary bar 27 kelisimsharttyń 12-si buzyldy. 9 kelisimshart boıynsha 1,5 mlrd teńge somaǵa bereshek óteldi, 4 kelisimshart boıynsha sot talap-aryzdary jiberildi. Eki kelisimshart boıynsha jumys zańnamaǵa sáıkes jalǵasýda. Memleketke qaıtarylǵan jer qoınaýynyń ýchaskeleri bolashaqta ınvestısıa tartý úshin aýksıonǵa shyǵarylady», - dedi ol.