Energetıka vıse-mınıstri Asqat Hasenov 15 aqpanda ótken brıfıńte memleketke qaıtarylǵan jer qoınaýynyń ýchaskeleri ınvestısıa tartý úshin aýksıonǵa qoıylatynyn málimdedi.
Jıynda Jer qoınaýy týraly kodekske qandaı túzetýler engiziletini aıtyldy, dep habarlaıdy Almaty-akshamy.kz Egemen.kz-ke silteme jasap
«2022 jyly jer qoınaýyn paıdalanýǵa salynǵan ınvestısıa somasy 7,7 trln teńge, onyń ishinde óndiriske – 2,8 trln teńge, geologıalyq barlaýǵa - 135,7 mlrd teńge, qalǵan 4,7 trln teńge kúrdeli shyǵyndarǵa, óńirlerdiń áleýmettik-ekonomıkalyq damýyna (ÓÁED), azamattardy oqytýǵa, ǴZTKJ-ǵa tıesili boldy», - dedi Asqat Hasenov QR Prezıdenti janyndaǵy Ortalyq komýnıkasıalar qyzmetinde ótken brıfıń barysynda.
Asqat Hasenov vedomstvonyń salalyq zańnamany jetildirý boıynsha júrgizip jatqan jumysy týraly egjeı-tegjeıli aıtyp berdi.
2022 jyly Energetıka mınıstrligi Jer qoınaýy týraly kodekske kelesi túzetýler daıyndaǵan:
- Óndirilýi qıyn qorlardy ıgerýge tartý maqsatynda «dástúrli emes kómirsýtekter» bóligine birqater normalar engizildi. Bul bastama «jeńil munaıdy» ıgerýden «shyǵarylýy qıyn munaıǵa» kóshýge daıyn bolýǵa jáne ony aldyn ala qarastyrýǵa múmkindik beredi.
- Aýksıondar arqyly jer qoınaýyn paıdalaný quqyǵyn berý rásimderi jeńildetildi, atap aıtqanda: memlekettik organdardyń qoldanystaǵy derekqorlarymen ıntegrasıa, bul aýksıonǵa usynylatyn qujattardyń sanyn qysqartýǵa múmkindik beredi; kepildik jarnany engizý; ekinshi oryn alǵan qatysýshymen kelisimshart jasasý.
- Retteýshilik jáne fıskaldyq preferensıalardyń eleýli paketin bekitetin kúrdeli jobalar boıynsha jer qoınaýyn paıdalaný salasynda «Jaqsartylǵan modeldik kelisimshart» (JMK) engizildi.
JMK tetigi eldiń mıneraldy-shıkizat bazasyn tolyqtyrýǵa jáne kúrdeli jobalar boıynsha ınvestısıa tartýǵa múmkindik beredi.
«Aýksıon arqyly kómirsýtekter boıynsha jer qoınaýyn paıdalaný quqyǵyn berý rásimi 2020 jyldan bastap tolyǵymen avtomattandyrylǵan jáne elektrondy túrde kórsetiledi, bul onyń barynsha ashyqtyǵyn qamtamasyz etedi», dedi vıse-mınıstr.
2020-2021 jyldary 3 elektrondyq aýksıon ótkizilgeni atap ótildi. Nátıjesinde kómirsýtekterdi óndirýdi barlaýǵa jáne óndirýge 39 jańa úlgilik kelisimshart jasaldy. Memlekettik búdjetke tólengen qol qoıý bonýsynyń somasy 12,8 mlrd teńgeni qurady, geologıalyq barlaýǵa 237,4 mln dollar somasyna ınvestısıa tartyldy.
«2022 jyly Energetıka mınıstrligi 2 aýksıon ótkizdi, oǵan 55 jer qoınaýy ýchaskesi shyǵaryldy. Aýksıondardyń nátıjeleri boıynsha shamamen 26 mlrd teńge somaǵa qol qoıý bonýsyn tóleı otyryp, 38 jer qoınaýy ýchaskesi ótkizildi. Geologıalyq barlaýǵa salynǵan ınvestısıalar 100,0 mln dollardan asty», - dep túıindedi Asqat Hasenov.