Tamara Dúısenova Qazaqstan shahmat federasıasynyń prezıdentimen kezdesti
QR Premer-Mınıstriniń orynbasary Tamara Dúısenova Qazaqstan shahmat federasıasynyń prezıdenti Tımýr Týrlovpen kezdesti. Qaýymdastyq basshysy bıylǵy nátıjeler men keler jylǵa arnalǵan josparlar týraly aıtyp ótti.
Jyl basynan beri Federasıa respýblıkalyq jáne halyqaralyq deńgeıdegi 30 jarys uıymdastyrdy, olarǵa barlyǵy 5,5 myńnan asa adam qatysty. Tuńǵysh ret mektep komandalary arasynda álem chempıonaty ótti. Dodaǵa 53 memleketten 400-ge jýyq jas shahmatshy qatysty. Sondaı-aq 23 shahmatshyǵa granttyq kómek kórsetildi, 89 adamǵa syıaqy tólendi.
«Biz shahmatty el ishinde nasıhattaýǵa, onyń óńirlerde damýyna úlken kóńil bólemiz. Ol úshin arnaıy “Shahmat kerýeni” atty aýqymdy jobany júzege asyrdyq. Eki aı ishinde 20 qalada áýesqoı shahmatshylar arasynda saıystar uıymdastyryldy. Oǵan myńnan asa adam qatysty, júlde qory 16 mln teńgeni qurady. Sondaı-aq osy bastama aıasynda barlyq oblystarda Federasıanyń ókildikteri ashyldy. Bastamalarymyz memleket tarapynan respýblıkalyq deńgeıde de, óńirlerde de úlken qoldaýǵa ıe bolyp jatqany mańyzdy. Sol úshin alǵys aıta otyryp, áriptestikti ary qaraı da nyǵaıtýǵa daıyn ekenimizdi aıtqym keledi», — dedi Tımýr Týrlov.
Óz kezeginde Tamara Dúısenova halyqaralyq deńgeıde joǵary jetistikke qol jetkizgen otandyq grosmeısterlerdiń sheberligin atap ótti. Qazirde shahmattan Qazaqstan quramasy – myqty ujymdardyń qatarynda.
«Memleket úshin jastardyń jan-jaqty damýy mańyzdy. Sizge jáne otandyq federasıaǵa bul baǵytta atqarylǵan jumys úshin alǵys bildiremin. Qazir sport týraly zań jobasy qarastyrylyp jatyr. Qujat sport túrlerin qarjylandyrý, salalyq federasıalar jumysyn retteýge múmkindik beredi. Memleket buqaralyq sporttyń damýy men ony jan-jaqty nasıhattaýǵa múddeli», — dedi Tamara Dúısenova.