QR Qarýly kúshteri Ulttyq áskerı-patrıottyq ortalyǵynda Qorǵanys mınıstriniń júldesine arnalǵan respýblıkalyq áskerı mýzyka baıqaýynyń nátıjesi jarıalandy.
Óńirlerdegi úmitkerlerge is-sharaǵa onlaın formatta qatysý múmkindigi berildi. Baıqaýǵa barlyǵy 80-nen astam ótinim kelip tústi, dep habarlaıdy almaty-akshamy.kz.
Qorǵanys mınıstriniń orynbasary general-leıtenant Muhamedjan Talasov qazylar alqasyna atqarylǵan kásibı jumysy, al baıqaý jeńimpazdary men júldegerlerine áskerı mýzykalyq shyǵarmashylyqty damytýǵa qosqan úlesi úshin alǵysyn bildirdi.
Qazaqstannyń eńbek sińirgen qaıratkeri, Memlekettik syılyqtyń laýreaty Tólegen Muhamedjanov tóraǵalyq etken qazylar alqasy «Áskerı bı» áýeni úshin Qorǵanys mınıstriniń bas júldesin Nurlybek Amanovqa tabys etti.
«Áskerı úrmeli orkestrlerge arnalǵan aspaptyq mýzyka» nomınasıasy boıynsha Nurlan Kýchkarov «Sarbazdar marshy» áýenimen jeńimpaz atandy. Ekinshi oryndy «Aıbyn» marshymen Nıkıta Pochıtalın ıelendi. Úshinshi oryn Beıbit Oralulynyń «Jas ulandar marshyna» berildi. Bul nomınasıa boıynsha «Mánshúk» marshymen Oleg Faıhner dıplomant atandy.
«Áskerı-patrıottyq án» nomınasıasy boıynsha Álibı Ábdinurov pen Ábdirahman Mamashulynyń «Áskerı marsh» shyǵarmasy úzdik dep tanyldy. Ekinshi oryn «Qarýly kúsh – qorǵanym» áni úshin Qaıyrjan Berdibaı men Talant Arǵynǵalıge berildi. Aısulý Tanı men Arasanbaı Estenovtyń «Sarbazdar men bas sardar» áni úshinshi oryndy ıelnendi. Janel Beketanov pen Qydyrjan Bıbatshaev «Shyǵys ulandary», Beıbit Oraluly men Aqylbaı Qulymshın «Alǵa sarbazdar», Qýanysh Kısmetov pen Estaı Rashqalıev «Qazaqstan sarbazdary», Áskerbek Qurmanaev «Serjanttar – serilerim» ánderimen dıplomant atandy.
«Bı toptaryna arnalǵan mýzykalyq shyǵarmalar» nomınasıasy boıynsha qazylar alqasy Sholpan Qorǵanbektiń «Qasıetti el» shyǵarmasyn úzdik dep tanydy. Ekinshi orynda Oleg Faıhnerdiń «Tomırıs», úshinshi orynda Sáýle Boranbaevanyń «Alǵa» kompozısıalary. Nıkıta Pochıtalın bul nomınasıada «Váls fantazıasy» áýenimen dıplomant atandy.
Baıqaýdy qorytyndylaǵan qazylar alqasynyń tóraǵasy Tólegen Muhamedjanov janrlyq ártúrlilik pen usynylǵan jumystardyń joǵary deńgeıin atap ótti.
Baıqaýdyń júlde qory alty mıllıon teńgeden asqanyn atap ótken jón. Baıqaý jeńimpazdary men júldegerlerine turmystyq tehnıka satyp alýǵa sertıfıkattar tapsyryldy. Bas júlde úshin syıaqy mıllıon teńgeni qurady.
İs-shara barysynda birqatar baıqaý jeńimpazdarynyń, júldegerleri men dıplomanttarynyń shyǵarmalary oryndaldy.