Qazaqstan halqy Assambleıasynyń «Birlik. Jasampazdyq. Órleý» atty HHHİİİ sesıasynda Qasym-Jomart Toqaev buqaralyq aqparat quraldary men blogerlerdiń áreketine qatysty pikirin aıtty, dep habarlaıdy Almaty-akshamy.kz.
«Buqaralyq aqparat quraldary jáne ózderin bloger sanaıtyn keıbir azamattar tabıǵat apatyna qatysty dúrbeleń týdyryp baıbalam salý, bılikti orynsyz aıyptaý qoǵamdy ortaq iske uıystyrýǵa bóget bolatynyn, memlekettik organdar ahýaldy ýysynan shyǵaryp aldy degen jalǵan uǵym qalyptastyratynyn túsinýge tıis. Mundaı áreket áleýmettik kúızelis týdyrady. Onyń saldary halqymyzdyń abyroı-bedeline nuqsan keltiredi. Sondyqtan bılik osyndaı keleńsiz jaǵdaılardyń aldyn alý úshin memleket qaýipsizdigine qater tóndiretinderge zań júzinde shara qoldanady», - dedi Memleket basshysy.
Prezıdent, sonymen birge, barlyq deńgeıdegi bılik ókilderi jurtshylyqpen, ásirese, bedeldi ári jaýapkershiligi joǵary belsendi azamattarmen tyǵyz baılanysta bolýy kerektigin aıtty. Olar halyqtyń pikirine qulaq asýy, eń bastysy, jedel jáne durys sheshim qabyldaýǵa tıis.
«Qazir memleket qordalanyp qalǵan kóptegen túıtkildiń túıinin tarqatýǵa májbúr. Azamattardyń basym kópshiligi muny túsinedi. Bir jaǵynan, Úkimettiń kóptegen salany jantalasa retteýine týra kelip otyr. Ekinshi jaǵynan, elimizdiń turaqty damýyna myqty negiz qalyptastyrýǵa tıis», - dedi Prezıdent.