Qasym-Jomart Toqaev Instagram paraqshasynda ustazdar men oqýshylardy Bilim kúnimen quttyqtady, dep habarlaıdy Almaty-akshamy.kz.
Prezıdent óz quttyqtaýynda óskeleń urpaq elimizdiń erteńi ekenine toqtalyp, memleket jas órenderdiń sapaly bilim, taǵylymdy tárbıe alýy úshin barlyq jaǵdaıdy jasaıtynyn atap ótti.
«Qurmetti ustazdar men oqýshylar! Sizderdi Bilim kúnimen shyn júrekten quttyqtaımyn!
Búgin jańa oqý jyly bastalady. Respýblıkamyzdaǵy barlyq mektep mıllıondaǵan shákirtke esigin aıqara ashady. Óskeleń urpaq – elimizdiń erteńi! Memleket jas órenderdiń sapaly bilim, taǵylymdy tárbıe alýy úshin barlyq jaǵdaıdy jasaıdy.
«Mekteptiń jany – muǵalim» dep Ahmet Baıtursynuly aıtqandaı, ustazdyń bala tárbıesindegi orny erekshe. Ár oqýshynyń tulǵa bolyp qalyptasýynda muǵalimder mańyzdy ról atqarady. Sondyqtan biz pedagogterdi árdaıym qoldaımyz. Qazaqstannyń bolashaǵy – bilimdi urpaqtyń qolynda! Olardyń oqýda ozat bolyp, qoǵamnyń barlyq salasynda bıik belesterdi baǵyndyrýyna tilektespin.
Jastarymyz keleshekte Otanymyzǵa adal qyzmet etip, onyń damýyna úles qosatynyna kámil senemin. Bilim kúni qutty bolsyn!» delingen jazbada.