Prezıdent óńirdi damytý jónindegi usynystardy qoldaıtynyn aıtty.
Prezıdent Qasym-Jomart Toqaev jaqynda qurylǵan Ulytaý oblysynyń ortalyǵy Jezqazǵan qalasyna bardy, dep habarlaıdy Almaty-akshamy.kz Aqordaǵa silteme jasap.
Ulytaý oblysynyń ákimi Berik Ábdiǵalı Prezıdentke oblystyń ákimshilik ortalyǵy Jezqazǵan qalasynyń jáne óńirdiń qazirgi jaǵdaıy men damý perspektıvalary týraly baıandady.
Ekologıalyq ahýaldyń nasharlaýy, aımaq arqyly ótetin respýblıkalyq joldardyń tozýy, ekonomıkanyń ártaraptandyrylmaýy nemese iri kásiporynǵa táýeldilik, ınjenerlik komýnıkasıa júıeleriniń eskirýi jáne áleýmettik sala óńirdiń negizgi problemalary retinde atap ótildi.
Ulytaý oblysynyń ákimi respýblıkalyq dárejedegi joldardyń tozýy óńir ekonomıkasynyń damýyn tejep turǵan basty faktor ekenine toqtalyp, osyǵan baılanysty tranzıttik kólik qatynastarynyń azaıǵanyn, sáıkesinshe baǵanyń qymbattaǵanyn, iskerlik belsendilik pen bıznestiń kenjelep qalǵanyn aıtty.
Berik Ábdiǵalı ekonomıkany ártaraptandyrý isin jedeldetý úshin arnaıy ekonomıkalyq aımaq qurý qajet ekenin atap ótti. Sonymen qatar Qasym-Jomart Toqaevtyń tapsyrmasyna sáıkes Úıtas – Aıdos sý qubyrynyń qurylysy 2025 jyly aıaqtalatynyn, al Jezqazǵan qalasyna Esqula qubyrymen sý tartý 2023 jyly bastalatynyn jetkizdi.
Óńir ákiminiń derekterine sáıkes, oblys ortalyǵyndaǵy turǵyn úılerdiń 33 paıyzy eskirgen. Qazir turǵyn úılerdi jańartý baǵdarlamasy júzege asyryla bastaǵan. Sonymen qatar 2022-2023 jyldary qalanyń jańa aýdanynda kóp qabatty 20 turǵyn úı salý josparlanǵan.
Berik Ábdiǵalı Qasym-Jomart Toqaevqa áleýmettik saladaǵy máselelerdi sheshý úshin memlekettik ýnıversıtet, qosymsha bilim berý ortalyǵyn, sapaly mektepter, dene shynyqtyrý-saýyqtyrý sport keshenderin jáne fılarmonıa zalyn salý qajet ekenin jetkizdi.
Jezqazǵan qalasynyń jáne Ulytaý oblysynyń jaǵdaıymen tanysqan Prezıdent óńirdi damytý jónindegi usynystardy qoldaıtynyn aıtty. Memleket basshysy, eń aldymen, jergilikti turǵyndardyń turmys sapasyn jaqsartý qajet ekenin eskertti. Qasym-Jomart Toqaev Úkimet pen oblys ákimdigine jol máselesine, ekologıaǵa, bilim salasyn damytýǵa kúsh salýdy tapsyrdy.
«Qala barlyq jaǵynan tartymdy bolýy kerek. Jumys óte kóp. Men Jezqazǵannyń, oblystyń eń kórikti óńir bolatynyna senemin», – dedi Prezıdent.
Budan keıin «Qazaqmys kompanıasy» JSHS Basqarma tóraǵasy Edýard Ogaı kásiporyndy jáne óńirdi damytý jóninde baıandama jasady. Kompanıa Jezqazǵan, Sátbaev qalalarynyń ınfraqurylymyn damytýǵa úles qospaq. Bıznestiń áleýmettik jaýapkershiligi turǵysynan «Qazaqmys» bıyl 25,4 mıllıard teńge bólgen. Bul byltyrǵyǵa qaraǵanda eki ese kóp. Memleket basshysy aldaǵy aýqymdy jumystar úshin bul qarjynyń jetkiliksiz bolatynyn aıtyp, bólinetin qarjyny kóbeıtý týraly usynysyn jetkizdi.
«Men myna máselege toqtalǵym keledi. Oblys ákiminiń óńirdi damytý týraly josparyn tyńdadyńyzdar. Áleýmettik máseleler sheshimin tabýǵa tıis. «Qazaqmys» kompanıasyn osy iske belsendi túrde atsalysýǵa shaqyramyn. 25,4 mıllıard teńge mundaı aýqymdy jumystar úshin jetkiliksiz bolýy múmkin. Qarjyny ulǵaıtý múmkindigin qarastyrǵan jón. Áleýmettik nysandardyń qurylysyna kómektesý qajet. Sport ǵımarattary kerek. Jergilikti halyq úlken úmit artyp otyr. Osy turǵydan alǵanda qaladaǵy jaǵdaıdy jaqsartýymyz kerek. Árıne, mádenı nysandarǵa da erekshe kóńil bólinýi qajet», – dedi Qasym-Jomart Toqaev.
Kompanıa basshylyǵy densaýlyq saqtaý, bilim berý, sport salalaryna erekshe kóńil bólinetinin baıandady. Atap aıtqanda, kelesi jyly Jezqazǵanda balalarǵa arnalǵan sport akademıasy men 200 balaǵa arnalǵan ınternat salý máselesi de qarastyrylǵan.
Qasym-Jomart Toqaev sport nysanyn salǵanda ártúrli sportty qamtıtyn kóp fýnksıaly etip salý qajet ekenin atap ótti.
Sonymen qatar kompanıa jańa standarttarǵa sáıkes turǵyn úıler qurylysyn qolǵa alýdy josparlap otyr.
