Pandemıaǵa deıingi deńgeıge oraldy.
2021 jyly Qazaqstan ekonomıkasy 4,1%-ǵa ósti. Bul kórsetkish Qazaqstan ekonomıkasy pandemıaǵa deıingi deńgeıge oralǵanyn kórsetedi. Bul týraly QR Ulttyq bankiniń tóraǵasy Ǵalymjan Pirmatov aıtty, dep habarlaıdy Almaty-akshamy.kz Egemen.kz cilteme jasap.
«2021 jyly álemdik ekonomıka pandemıaǵa deıingi deńgeıge qaıta oraldy. Jahandyq jalpy ishki ónimniń ósýi 6,1% qurap, 40 jyldan astam ýaqyt ishinde eń joǵarǵy kórsetkishke jetti. Ótken jyly Qazaqstan ekonomıkasy da 4,1%-ǵa ósip, pandemıaǵa deıingi deńgeıge oraldy. Álemdik ekonomıkanyń tez qalpyna kelýi shamadan tys suranysqa ákep soqtyryp, shıkizat, materıaldar men azyq-túlik baǵasynyń qymbattaýyna sebepshi boldy. Bul energetıkalyq daǵdaryspen birge álemniń kóptegen elderinde rekordtyq ınflásıaǵa ákeldi», - dedi Ǵalymjan Pirmatov Senattyń jalpy otyrysynda.
Onyń aıtýynsha, syrtqy faktorlarmen qatar jekelegen taýar naryǵyndaǵy ishki teńgerimsizdik eldegi ınflásıalyq qysymdy da kúsheıtti.
«Ótken jyldyń birinshi jartysynda ınflásıalyq prosesterdiń turaqtanýyna qaramastan, jyldyń ortasynan bastap ınflásıa azyq-túlik, shıkizat pen materıaldar baǵasynyń jalpy álemdik trendiniń aıasynda jedeldeı bastady. Jazǵy kezeńde kókónis naryǵyndaǵy teńgerimsizdik, janar-jaǵarmaı jáne retteletin qyzmetter baǵasynyń ósýi – ishki proınflásıalyq trıggerler boldy. Osy jaǵdaıda Ulttyq bank Úkimetpen birlesip, Memleket basshysynyń tapsyrmasyna sáıkes, ınflásıany 8,5% sheginde ustap turý boıynsha sharalar qabyldady», - dep túıindedi Ulttyq bank tóraǵasy.