Prezıdent árqaısysynyń syıymdylyǵy 3000 tekshe metr bolatyn «Balqash» taza aýyzsý stansıasynyń eki rezervýarynyń jáne sorǵy stansıasynyń qurylysymen tanysty.
Qasym-Jomart Toqaevqa «Kaptaj», «Bastaý» toǵandarynan jáne «Medeý» súzgi stansıasynan keletin sýdyń osy rezervýarlarda jınaqtalyp, zararsyzdandyrylatyny jóninde málimet berildi, dep habarlaıdy almaty-akshamy.kz.
Tazalanǵan aýyzsý arnaıy ornatylǵan sorǵylardyń kómegimen Kamenskoe plato, Kólsaı, Iýbıleınyı jáne Muztaý yqshamaýdandarynyń magıstraldy jelileri arqyly taratylady.
Nysandy aralap kórý barysynda Memleket basshysyna Almaty qalasyn sýmen qamtý jelisiniń qazirgi jaı-kúıi men damý jospary týraly baıandaldy.
Prezıdenttiń tapsyrmalaryn oryndaý aıasynda qala ákimdigi byltyr jańadan 117 shaqyrym sýmen qamtý jelisin salyp, 46 shaqyrym sý qubyryn jańǵyrtý jumystaryn júrgizgen. Atalǵan sharalar Almaty halqynyń 99,3 paıyzyn sýmen qamtıtyn ortalyq jelige qosýǵa múmkindik berdi. Bıyl taǵy 142 shaqyrym sý qubyryn tartyp, 48 shaqyrym jelige jóndeý jumystaryn júrgizý josparlanyp otyr. Bul jyl sońyna deıin turǵyndardyń 99,6 paıyzyna sý jetkizip, jelilerdiń tozý deńgeıin 53,8 paıyzǵa deıin tómendetýge septigin tıgizedi.
Qasym-Jomart Toqaevqa Medeý aýdanynyń 50 myń turǵynyn sýmen qamtýdyń qosalqy sqemasyn iske qosý jospary jóninde málimet berildi. Al Alataý, Bostandyq jáne Naýryzbaı aýdandarynyń halqyn sýmen turaqty ári sapaly túrde qamtamasyz etý úshin eki toǵan salynyp jatyr jáne taǵy ekeýiniń jobalaý jumystary júrgizilýde.