Prezıdent Qazaqstanǵa resmı saparmen kelgen Shveısarıanyń federaldy keńesshisi, Syrtqy ister mınıstri Inásıo Kassıspen kezdesý ótkizdi.
Qasym-Jomart Toqaev eki el arasyndaǵy tyǵyz qarym-qatynas dostyq pen yntymaqtastyq rýhynda damyp kele jatqanyn atap ótti, dep habarlaıdy Almaty-akshamy.kz Aqordaǵa silteme jasap.
Memleket basshysy Shveısarıanyń Almatydaǵy Qurmetti konsýldyǵy qyzmetiniń bastalýymen quttyqtady. Onyń resmı ashylý rásimine Inásıo Kassıs qatysty.
Memleket basshysy Shveısarıa Qazaqstannyń Eýropadaǵy negizgi saıası, saýda jáne ekonomıkalyq seriktesteriniń biri ekenin aıtty. Qazirgi ýaqytta Shveısarıa Qazaqstannyń jetekshi 20 saýda seriktesiniń qataryna kiredi. Elimizge jalpy kólemi 32,5 mıllıard dollardan astam ınvestısıa quıǵan úsh iri ınvestordyń biri.
«Biz Qazaqstan ekonomıkasynyń perspektıvti salalaryna ınvestısıa quıýǵa daıyn jańa shveısarıalyq kompanıalardy qoldaımyz. Qazaqstan Úkimeti men Stadler temirjol konserni arasynda qol qoıylǵan kelisimniń keleshegi zor dep oılaımyn. Sondyqtan osy mámileniń júzege asyrylý barysyn erekshe qadaǵalaımyz. Bul bizdiń qarym-qatynasymyzdyń damýyna tyń serpin beredi», – dedi Qasym-Jomart Toqaev.
Memleket basshysy Shveısarıa Konfederasıasynyń Prezıdenti Alen Bersege izgi tilegin joldady.
Inásıo Kassıs ekijaqty yntymaqtastyqtyń qazirgi damý deńgeıine oń baǵa berip, ony nyǵaıtý isine atsalysýǵa daıyn ekenin jetkizdi. Shveısarıanyń Syrtqy ister mınıstri elimizde júrgizilip jatqan aýqymdy reformalardy joǵary baǵalady.
«Ekijaqty saýda men ınvestısıa tyǵyz baılanystarymyzdyń mańyzdy baǵyty sanalady. Ózińiz aıtqandaı, eger Shveısarıanyń jeke kompanıalary sizdiń elińizge ınvestısıa quısa, bul reformalaryńyzdyń tabysty júzege asýyna, sondaı-aq qarjy salý úshin jasalatyn jaǵdaıdyń jaqsarýyna yqpal etedi», – dedi mınıstr.
Áńgimelesý barysynda óńdeý ónerkásibi, saýda jáne logıstıka, mashına jasaý, aýyl sharýashylyǵy, qarjy qyzmetteri, sıfrlandyrý, bilim berý salalarynda birlesken ınvestısıalyq jobalardy iske asyrýǵa erekshe nazar aýdaryldy.
Sonymen qatar kezdesýde halyqaralyq jáne óńirlik kún tártibindegi ózekti máseleler qarastyryldy.