Qasym-Jomart Toqaev QR Prezıdenti İs basqarmasynyń Medısınalyq ortalyǵyna qarasty Sanıtarıalyq-epıdemıologıalyq saraptama ortalyǵynyń bıyl paıdalanýǵa berilgen jańa ǵımaratyn aralap kórdi.
Sanıtarıalyq-epıdemıologıalyq saraptama ortalyǵynda qorshaǵan orta obektilerine jáne tamaq ónimderine bakterıologıalyq, molekýlárlyq-genetıkalyq, parazıtologıalyq, sanıtarıalyq-hımıalyq jáne toksıkologıalyq, radıologıalyq zertteý jumystary júrgiziledi, dep habarlaıdy almaty-akshamy.kz.
Memleket basshysyna Ortalyqtaǵy zamanaýı quraldarmen jabdyqtalǵan jáne eń jańa ádistemelerdi paıdalana otyryp, jedel ári naqty nátıjelerdi alýǵa múmkindik beretin zerthanalar tanystyryldy. Onda zamanaýı analızatorlarmen birge agressıvti-hımıalyq reaktıvterdi qajet etpeıtin, ekspress-ádistemelerdi qoldanatyn portatıvti zerthanalyq qurylǵylar ornatylǵan. Bul zertteý ýaqytyn edáýir qysqartyp qana qoımaı, qarjyny da únemdeıdi.
Qazaqstan Respýblıkasy Prezıdentiniń İs basqarmasy Medısınalyq ortalyǵynyń basshysy Alekseı Soıdyń aıtýynsha, Sanıtarıalyq-epıdemıalyq saraptama ortalyǵynda 8 zerthana jumys isteıdi. Aldaǵy ýaqytta zertteýler nomenklatýrasyn jylyna 2000-ǵa deıin keńeıtý kózdelip otyr.
Sonymen qatar zertteýlerdiń jańa túrlerin, halyqaralyq sapa jáne quzyrettilik standarttaryn engizý nátıjesinde Ortalyq Referens zerthana mártebesine ıe bola alady. Iaǵnı, basqa zerthanalardaǵy kúmán týdyrǵan zertteýlerdiń durystyǵy men dáldigin osy jerde naqty tekserýge bolady.
Qasym-Jomart Toqaev óz mindetterin úlken jaýapkershilikpen atqaryp júrgen mamandarǵa alǵys aıtyp, jańa saraptama ortalyǵy el ıgiligine qyzmet etetinine senim bildirdi.
Memleket basshysy Medısınalyq ortalyqtyń qoǵamdyq densaýlyq saqtaý isine qosqan úlesi men strategıalyq mańyzy zor ekenin atap ótti.