Memleket basshysy «Qazaqtelekom» AQ basqarma tóraǵasy Qýanyshbek Esekeevti qabyldady, dep habarlaıdy Almaty-akshamy.kz Aqordaǵa silteme jasap.
Prezıdentke «Qazaqtelekom» AQ kompanıalar tobynyń 2022 jyly qol jetkizgen negizgi qarjy-ekonomıkalyq kórsetkishteri men júzege asyrýǵa josparlaǵan perspektıvti jobalary týraly málimet berildi.
Qýanyshbek Esekeevtiń aıtýynsha, ótken jyly «Qazaqtelekom» AQ-nyń negizgi qarjy jáne ekonomıkalyq kórsetkishteri ósti. Bul bıyl birqatar aýqymdy jobany iske asyrýǵa múmkindik beredi. Olardyń negizgisi 5G jelisin júrgizý jobasy bolmaq. Atalǵan mindetti «MTS» JSHS jáne «Ksell» AQ operatorlarynyń konsorsıýmy atqarady. «Qazaqtelekom» aksıonerlik qoǵamynyń enshiles kompanıalary 2027 jylǵa deıin elimiz boıynsha 7 myńnan astam bazalyq stansıa salýǵa tıis. Bıyl Astana, Almaty jáne Shymkent qalalarynda osyndaı 486 stansıa paıdalanýǵa beriledi. Qasym-Jomart Toqaevqa «Ázerbaıjan – Qazaqstan» baǵyty boıynsha Kaspıı teńiziniń tabany arqyly tartylatyn talshyqty-optıkalyq baılanys jelisiniń qurylysyna qatysty halyqaralyq jobany «AzerTelecom» kompanıasymen birlesip júzege asyrý jumystary jalǵasatyny jóninde baıandaldy. Sonymen qatar bıyl aýyldardy odan ári ınternetpen qamtamasyz etý, Qazaqstan abonentterin eskirgen ADSL jelilerinen optıkaǵa kóshirý, kópqabatty turǵyn úılerdi GPON tehnologıasy arqyly jyldamdyǵy joǵary ınternetke qosý sekildi jobalar iske asyrylady.
Kezdesý sońynda Prezıdent halqymyz ben ekonomıkamyz úshin josparlanǵan jobalardy ýaqytyly jáne sapaly oryndaýdyń mańyzdylyǵyna nazar aýdardy. Budan bólek, Memleket basshysy qalalar men aýyldyq jerlerdegi telekomýnıkasıa jelilerin odan ári damytý, sondaı-aq Qazaqstannyń tranzıttik áleýetin arttyrý úshin halyqaralyq derekter trafıginde jelilik ınfraqurylymdy órkendetý jóninde birqatar naqty tapsyrma berdi.