Qazaqstan Prezıdenti Qasym-Jomart Toqaev qazaqstandyqtardy Konstıtýsıa kúnimen quttyqtady, dep habarlaıdy Almaty-akshamy.kz
«Qurmetti otandastar!
Sizderdi Konstıtýsıa kúnimen quttyqtaımyn!
Ata zań – memlekettiligimizdiń myzǵymas tiregi ári elimizdiń saıası jáne qoǵamdyq qurylysyn, aınymas qundylyqtary men damý jolyndaǵy strategıalyq baǵyt-baǵdaryn aıqyndaıtyn basty qujatymyz.
Jalpyulttyq referendým arqyly jańartylǵan Konstıtýsıamyz ultty uıystyrýdyń naǵyz sımvolyna aınaldy. Sondaı-aq negizgi zańymyz eldiń saıası júıesin demokratıalandyrýdy, zań ústemdigin qamtamasyz etýdi jáne halyqtyń ál-aýqatyn arttyrýdy kózdeıtin aýqymdy ózgeristerdiń berik tuǵyry sanalady. Konstıtýsıalyq Sottyń qurylýy – osyndaı ınstıtýsıonaldy reformanyń biri. Bul qurylym azamattardyń quqyqtary men bostandyqtary qorǵalatynyna árdaıym kepildik beretin Ata zańymyzdyń rólin meıilinshe arttyrdy.
Jalpyǵa birdeı jol ashatyn Ádiletti Qazaqstandy qurý úshin Konstıtýsıa qaǵıdalary qatań saqtalyp qana qoımaı, qoǵamnyń sana-sezimine birjola ornyǵýǵa tıis. «Adal azamat» degen atqa laıyq árbir adam Ata zańnyń bıik murattaryn qoldaıtynyna jáne ony ómirlik ustanymyna aınaldyratynyna nyq senimdimin.
Barshańyzǵa zor densaýlyq, baq-bereke jáne tolaǵaı tabys tileımin!» - delingen Prezıdent quttyqtaýynda.