Memleket basshysy «QazaqGaz» UK» AQ basqarma tóraǵasy Sanjar Jarkeshovti qabyldady, dep habarlaıdy almaty-akshamy.kz akorda.kz silteme jasap.
Prezıdentke ulttyq kompanıanyń bıylǵy birinshi jartyjyldyqtaǵy negizgi qarjy-sharýashylyq kórsetkishteri jáne gaz salasyn reformalaý jumystarynyń barysy týraly esep berildi.
Qasym-Jomart Toqaevqa «QazaqGaz» UK» aksıonerlik qoǵamy 2022 jyldyń basynan bastap Atyraý, Mańǵystaý oblystary men Almaty qalasynda óz qarajaty esebinen somasy 400 mıllıard teńge bolatyn ınvestısıalyq jobalardy iske asyrǵany jóninde baıandaldy.
Byltyr jyl basynan beri ulttyq kompanıa halyq pen bıznes úshin gaz baǵasyn 389 mıllıard teńgege sýbsıdıalady. Osy kezeńde 450 myńǵa jýyq qazaqstandyq tabıǵı gazǵa qol jetkizdi.
Memleket basshysyna gaz tapshylyǵy máselesiniń sheshilýine qatysty málimet berildi. Sanjar Jarkeshovtiń aıtýynsha, qabyldanǵan sharalar aldaǵy kúzgi jáne qysqy kezeńde Qazaqstanda tabıǵı gazben artyǵymen qamtamasyz etedi.
Sonymen qatar Qasym-Jomart Toqaevqa Beıneý – Bozoı – Shymkent magıstraldy gaz qubyrynyń ekinshi jelisine qatysty jobanyń júzege asyrylý barysy jáne Qytaı Halyq Respýblıkasymen jańa eksporttyq kelisimshartqa qol qoıylýy jóninde aqparat berildi.
Budan bólek, Prezıdentke gaz salasynyń orta merzimdi strategıasyn júzege asyrý, gaz óńdeý qýatyn ulǵaıtý jáne elimizdi odan ári gazben qamtamasyz etý perspektıvalary jóninde málimet berildi.
Memleket basshysyna gazdyń resýrstyq bazasyn keńeıtý jumystary týraly da baıandaldy. «QazaqGaz» UK» AQ tóraǵasynyń aıtýynsha, 2023 jyldyń sońyna deıin jańa Anabaı gaz ken orny iske qosylady, sondaı-aq Prıdorojnoe ken ornyn ıgerýge daıyndyq bastaldy.
Kezdesý sońynda Qasym-Jomart Toqaev ishki naryqqa gaz jetkizýdi turaqty túrde qamtamasyz etýge, jylytý maýsymyna ýaqtyly daıyndalýǵa, únemdi tutyný tujyrymdamasyn engizýge jáne baǵa belgileý isin reformalaýǵa baǵyttalǵan birqatar tapsyrma berdi.