Qasym-Jomart Toqaevtyń tóraǵalyǵymen Qaýipsizdik Keńesiniń otyrysy ótti.
Jıynda halyq arasyndaǵy qumar oıynǵa táýeldilik máseleleri qarastyryldy, dep habarlaıdy Almaty-akshamy.kz.
– Sońǵy jyldary elimizde qumar oıynǵa táýeldilik beleń alyp barady. Keıbir otbasylar úshin bul úlken qasiretke aınaldy, – dedi Prezıdent. Prezıdent osy jaman ádetke, ásirese, jastar áýes ekenine nazar aýdaryp, memlekettik organdarǵa azamattardyń jekelegen sanattary úshin qumar oıyndarǵa qatysty shekteýlerdi kúsheıtýdi tapsyrdy. – Lýdomanıaǵa qarsy kúreste tárbıe isi men túsindirý jumystaryna erekshe mán berilýge tıis, – dedi Prezıdent. Osyǵan baılanysty Memleket basshysy salalyq mınıstrlikterge naqty mindetter júktedi.
Qasym-Jomart Toqaev qumar oıynǵa táýeldi azamattardyń qatysy bar qylmystar kóbeıgenine quqyq qorǵaý organdarynyń nazaryn aýdaryp, aldyn alý jumystaryn júrgizip, zańdylyq pen quqyqtyq tártipti qamtamasyz etý úshin sharalar qabyldaý jóninde tapsyrma berdi. Prezıdent elimizde lýdomanıanyń beleń alýyna qarsy baǵyttalǵan áleýmettik daǵdylardy qalyptastyrýda qoǵamnyń, din qyzmetkerleriniń jáne buqaralyq aqparat quraldarynyń atqaratyn róli erekshe ekenin atap ótti.
Sonymen qatar, Memleket basshysy oıyn bıznesi salasyndaǵy qarjylyq jáne basqa da quqyq buzýshylyqtardyń aldyn alý jumystaryn jandandyrý qajet ekenine nazar aýdardy.
– Barlyq qarjy qozǵalysyn qadaǵalap, zańǵa qaıshy áreket anyqtalǵan jaǵdaıda tıisti sharalar qabyldaý mańyzdy, – dedi Prezıdent.
Jıyn barysynda Úkimet músheleri men birqatar memlekettik organ basshylary baıandama jasady. Keńes otyrysynyń qorytyndysy boıynsha Qasym-Jomart Toqaev halyq arasyndaǵy qumar oıynǵa táýeldilikpen kúresý úshin zańnamalyq, uıymdastyrýshylyq jáne aqparattyq-ıdeologıalyq sharalar keshenin qabyldaýdy tapsyrdy.