Syrtqy ister mınıstrliginiń resmı ókili Aıbek Smadıarov: apatqa ushyraǵandar qaýipsizdik beldemshesin taqpaǵan, dep habarlaıdy Almaty-akshamy.kz.
Belgili jýrnalıs, «Zeıin Atyraý» erekshe balalardy ońaltý ortalyǵynyń negizin qalaǵan Araılym Baǵytjan Antaládaǵy iri jol apatyna túsip, ómirden ótkenin buǵan deıin habarlaǵan bolatynbyz.
«Ókinishke qaraı, keshe sýyq habar aldyq. Jol-kólik apaty bolyp, bir januıa zardap shekti. Onyń saldarynan 1989 jyly týǵan áıel men eki jasar qyzy qaıtys boldy. 86 jyly týǵa er azamat, sol áıeldiń kúıeýi aýyr jaǵdaıda, jansaqtaý bóliminde jatyr qazir. Al 2014 jyly týǵan er bala aýrýhanada. Onyń densaýlyǵy men ómirine eshqandaı qaýip tónip júrgen joq.
Bizdiń dıplomattar ol otbasynyń týystarymen baılanysta. Búgin-erteń týystary Túrkıaǵa jetý kerek. Barlyq qajetti konsýldyq, quqyqtyq kómek kórsetemiz. Bul otbasyǵa Túrkıaǵa demalýǵa kelgen bolatyn. 31 tamyz kúni kelgen, búgin elge qaıtý kerek edi. Keshe bir ekskýrsıaǵa shyǵyp, safarı-kólikke minip, basqa kólikpen soqtyǵysqa kezde bári máshıneden ushyp ketken», - dedi ol.
Mınıstrliktiń resmı ókili kólikte 15 adam bolǵan degen derek bar ekenin aıtady.
«Sonyń tórteýi bizdiń azamattar. Ekeýi kóz jumdy. Ekeýi qazir aýrýhanada. Bul otbasynda saqtandyrý polústeri bolǵan. Túrkıaǵa týystary jetken soń, sol jerde naqty sheshim qabyldanady. Jaqyn arada Qazaqstanǵa tezdetip jetkizýge kómek kórsetiledi», - dedi ol.
Sondaı-aq, SİM resmı ókili qazaqstandyqtardy shetelde júrgen kezde qaýipsizdikke basa kóńil bólýge shaqyrdy.
«Aıta ketetin jaıt, bizdiń azamattar shetelge demalýǵa barǵan kezde nemese basqa maqsattarmen júrgen kezde qaýipsizdik sharalaryn qatań saqtaǵan jón dep oılaımyz. Bizdiń bilýimizshe, ras pa ótirik pe, tergeý anyqtaı jatar, qaýipsizdik beldemshesin taqpaǵan. Sodan máshıneden bári ushyp shyqqan», - dedi Aıbek Smadıarov.