Qurmetti otandastar!
Barshańyzdy Konstıtýsıa kúnimen quttyqtaımyn! Ata zań – memlekettiligimizdiń berik tuǵyry, elimizdiń dáıekti ári turaqty damýynyń myzǵymas kepili.
Memleket pen qoǵam ómiriniń negizin aıqyndaıtyn Konstıtýsıada azamattardyń múddesine, quqyǵy men bostandyǵyna aıryqsha nazar aýdarylǵan. Sondyqtan Qazaqstanda júzege asyrylyp jatqan barlyq aýqymdy ózgeristiń maqsaty – halyqtyń ál-aýqatyn jaqsartý.
2022 jylǵy konstıtýsıalyq reformanyń nátıjesinde jan-jaqty demokratıalandyrý úderisi bastaldy, saıası júıeni jańǵyrtýǵa jaǵdaı jasaldy. Quqyq qorǵaý ınstıtýttarynyń jáne Adam quqyqtary jónindegi ýákildiń mártebesi kóterildi. Sondaı-aq Konstıtýsıalyq Sot quryldy. Bul mekeme qazir elimizde zań ústemdigin ornyqtyrýǵa barynsha yqpal etip otyr.
Konstıtýsıanyń ádil ári berekeli qoǵamnyń tiregi sanalatyn zań men tártipti qamtamasyz etý jolyndaǵy róli nyǵaıa tústi. Azamattardyń negizgi zańymyzdy qurmettep, onyń talaptaryn buljytpaı oryndaýy – naǵyz otanshyldyqtyń jáne joǵary jaýapkershiliktiń aıqyn kórinisi. Biz Konstıtýsıada bekitilgen qasterli qundylyqtarǵa súıene otyryp, barshaǵa birdeı múmkindik beretin Ádiletti Qazaqstandy birge quratynymyzǵa kámil senemin.
Ár shańyraqqa baq-bereke, tolaıym tabys tileımin!