Almatyda Konstıtýsıa kúnine oraı Ulttyq ulannyń B.Momyshuly atyndaǵy 5571 áskerı bóliminiń sarbazdary «Konstıtýsıa – máńgilik eldiń tuǵyry» taqyrybynda ótken «dóńgelek ústel» basynda aıtary bar aǵa býynmen júzdesti.
A.Chehov atyndaǵy Ortalyq qalalyq kitaphananyń beldi kitaphanashysy Aınur Balaýbaeva uıymdastyrǵan salıqaly keshke Almaty qalalyq sotynyń otstavkadaǵy sýdıasy Sovethan Sákenuly, Qazaqstan Qarýly Kúshteriniń ardageri, polkovnık Muhamedjan Ábdibek jáne aqyn, «Qazaqstannyń 100 jańa esimi» jobasynyń jeńimpazy Erjan Jumabek keldi.
Meımandar jastarǵa Ata zań týraly, ondaǵy ár adamnyń quqyǵyna kepil bola alatyn baptary týraly áńgimelep berdi.
– Qurmetti jastar, ózderińiz bilesizder, máselen, úı turǵyzatyn bolsaq, onyń aldymen irgetasyn qalap alamyz. İrgesi myqty qalanǵan úı eshqashan qulamaıdy, myzǵymaıdy. Sol sekildi, osy otyrǵan kez-kelgenimizge, jerimizge, elimizge qorǵan bolýǵa tıis Konstıtýsıamyz da myǵym bolýy kerek. Mynaý Amerıka, Germanıada konstıtýsıalaryna jıi ózgeris engize bermeıdi. Olar oǵan óte muqıat, asqan jaýapkershilikpen qaraıdy. Al bizde, jasyratyny joq, birneshe márte ózgertildi. Oǵan sebep te joq emes. Alǵashqy Ata zańdarymyz eski ákimshil-ámirshil erejelerge súıengendikten, qoǵamnyń talap-tilegine jaýap bere almady. Al sońǵy qabyldanǵan Konstıtýsıamyz respýblıkalyq referendým jáne erkin saılaý arqyly tikeleı halyqtyń qatysýymen qabyldandy. Mine, bılik halyqpen sanasqanda ǵana baqýatty el bolamyz. Al Qazaqstandy álem kógine kóteretin bilimdi urpaq. Aınalaıyndar, kóp oqyńdar, toqyńdar, ilim-bilimmen sýsyndańdar, biz senderge senemiz, – dedi Almaty qalalyq sotynyń otstavkadaǵy sýdıasy Sovethan Sákenuly.
Keshte sóz alǵan Qazaqstan Qarýly Kúshteriniń ardageri, polkovnık Muhamedjan Ábdibek te jastardy Ata zańdy qurmetteýge shaqyrdy.
– «Tártipke baǵynǵan qul bolmaıdy». Laýazymdy qyzmetker bolsyn, qarapaıym eńbek adamy bolsyn, bárimiz zań aldynda teń bolýymyz kerek. Al Ata zańymyzda kózdelgen baptardyń bári qoǵamnyń, adamzattyń, memlekettiń paıdasyna qyzmet etýge tıis. Zańdyq turǵyda myǵym, ádiletti, quqyqtyq memleket qurý – óz qolymyzda», – dedi M.Ábdibek.