Qasym-Jomart Toqaev Qazaqstanǵa jumys saparymen kelgen Tatarstan Prezıdenti Rýstam Mınnıhanovty qabyldady.
Taraptar saýda-ekonomıkalyq, ónerkásip jáne tehnologıa salaryndaǵy ózara yntymaqtastyqty nyǵaıtýdyń perspektıvalaryn talqylady, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaev Rýstam Mınnıhanovqa iltıpat bildirip, Reseı Federasıasymen aradaǵy kópjaqty qatynastardy damytý isinde Tatarstannyń mańyzdy oryn alatynyn atap ótti.
Memleket basshysynyń aıtýynsha, Tatarstan Qazaqstanmen ekonomıkalyq, ónerkásiptik jáne tehnologıalyq yntymaqtastyqty nyǵaıtý deńgeıi boıynsha Reseı Federasıasy sýbektileriniń ishinde kósh bastap keledi. 2021 jyldyń 11 aıynyń qorytyndysy boıynsha ózara taýar aınalymy 423 mıllıon dollarǵa jetken.
«KamAZ» jáne «Tatneft» kompanıalarynyń qatysýymen mashına jasaý salasynda quny 1,8 mıllıard dollar bolatyn jobalardyń júzege asyrylýy – osyndaı tabysty yntymaqtastyqtyń jarqyn kórinisi. Qostanaı jáne Qaraǵandy oblystarynda «KAMAZ» avtobólshekteri men «Tatneft» dóńgelekterin shyǵaratyn úsh zaýyttyń qurylysy belsendi júrgizilýde.
Memleket basshysy Qazaqstannyń ınvestorlarǵa, onyń ishinde Tatarstannyń ıvestorlaryna qolaıly bolý úshin qajetti jaǵdaıdyń bárin jasaıtynyna nazar aýdardy.
Sonymen qatar Qasym-Jomart Toqaev Rýstam Mınnıhanovqa Tatarstanmen birlesken jobalardy júzege asyrý úshin qosymsha múmkindikter týǵyzatyn elde júrgizilip jatqan aýqymdy ekonomıkalyq reformalar men naqty damý baǵdarlamalary týraly aıtty.
Tatarstan Prezıdenti jyly qabyldaǵany úshin Qasym-Jomart Toqaevqa alǵys bildirip, qazaqstandyq seriktestermen yqpaldastyqty nyǵaıtý jónindegi birqatar ınvestısıalyq jobalar men tatar bıznesi josparynyń júzege asyrylý barysy týraly málimet berdi.