Eki el arasyndaǵy yntymaqtastyqty keńeıtý joldaryn talqylady.
Memleket basshysy Qasym-Jomart Toqaev Qazan Kremlin aralap kórgennen keıin Tatarstan Respýblıkasynyń Prezıdenti Rýstam Mınnıhanovpen kezdesý ótkizdi. Kezdesýdiń aldynda Qazaqstan Prezıdenti «Qurmetti qonaqtar kitabyna» qoltańba qaldyrdy, dep habarlaıdy Almaty-akshamy Aqorda cilteme jasap.
Qasym-Jomart Toqaev pen Rýstam Mınnıhanov saýda-ekonomıkalyq, ınvestısıalyq jáne mádenı-gýmanıtarlyq salalar boıynsha Qazaqstan men Tatarstan arasyndaǵy yntymaqtastyqty keńeıtý joldaryn talqylady.
Qazaqstan Prezıdenti myńjyldyq tarıhymen, baı mádenı muralarymen tanylǵan Tatarstanǵa saparmen kelýge shaqyrǵany úshin Rýstam Mınnıhanovqa alǵys aıtty.
«Munda Qazaqstan Prezıdenti retinde kelgenime óte qýanyshtymyn. Sizben elimizde birneshe ret kezdestim. Biz kóptegen másele týraly, sonyń ishinde Qazaqstan men Tatarstan arasyndaǵy yntymaqtastyqty damytý jáne nyǵaıtý jóninde sóılestik. Ekijaqty yntymaqtastyqqa negizdelgen mańyzdy jobalarymyz bar. Eger Qazaqstan men Tatarstan basshylary saıası erik-jiger tanytatyn bolsa, bul jobalardyń júzege asyrylatyny sózsiz», – dedi Memleket basshysy.
Qasym-Jomart Toqaev Rýstam Mınnıhanovqa keshe Máskeýde Reseı Prezıdenti Vladımır Pýtınmen júrgizgen tabysty kelissózi týraly málimet berdi.
«Kelissózdiń mazmunyna, kezdesý nátıjelerine kóńilim toldy. Biz, árıne, Reseı Federasıasynyń sýbektisi retinde Tatarstanmen aradaǵy yntymaqtastyqty Qazaqstannyń damyta beretini jóninde de áńgimelestik. Vladımır Pýtın baspasóz máslıhatynda sóılegen sózinde Reseı Federasıasynyń qarqyndy damyp kele jatqan sýbektileriniń biri Tatarstanǵa erekshe toqtaldy jáne osy respýblıkaǵa jumys saparymen barý jónindegi sheshimimdi qoldady», – dedi Qasym-Jomart Toqaev.
Memleket basshysy Qazaqstan men Tatarstan arasyndaǵy mádenı-gýmanıtarlyq baılanystardy damytýdyń mańyzdy ekenin atap ótti.
«Shyn máninde, elderimiz arasyndaǵy baılanystardyń tarıhy tereń. Tarıhymyz – ortaq. Bul taqyrypta jazylǵan maqalalar men kitaptardy qyzyǵa oqımyn. Oqyǵan saıyn tarıhı baılanystarymyzdyń sonshalyqty tereń ári sabaqtasyp jatqanyna kóz jetkizemin, tipti tań qalamyn. Mádenı-gýmanıtarlyq yntymaqtastyqty mindetti túrde damytý kerek degen pikirińizdi qoldaımyn. Qazaqstan buǵan daıyn», – dedi Qazaqstan Prezıdenti.
Qasym-Jomart Toqaev Rýstam Mınnıhanovtyń myqty ári bedeldi basshylyǵymen Tatarstannyń qarqyndy damyp kele jatqanyn joǵary baǵalap, respýblıka halqynyń ıgiligi jolyndaǵy qyzmetine tabys tiledi.
Tatarstan Prezıdenti Qazan qalasyna saparmen kelgeni úshin memleketimizdiń basshysyna alǵys bildirip, Qazaqstanmen yntymaqtastyqty damytýdyń strategıalyq mańyzyn atap ótti.
«Biz úshin bul – úlken abyroı. Qazaqstan men Reseı arasyndaǵy dostyq baılanystar aıasynda Sizdiń elińizben yqpaldastyqty nyǵaıtý múmkindigin joǵary baǵalaımyz. Qazaqstan – Tatarstan Respýblıkasy úshin strategıalyq seriktes. Qazaqstannyń aımaqtarymen kóptegen kelisim jasalǵan. Sizdiń elińizde tabysty jumys istep jatqan kompanıalarymyzdy kóptep mysalǵa keltirýge bolady», – dedi Rýstam Mınnıhanov.
Kezdesý sońynda Rýstam Mınnıhanov Qazaqstan men Tatarstan arasyndaǵy yntymaqtastyqty damytýǵa, eki el arasyndaǵy dostyq pen ózara túsinistikti nyǵaıtýǵa qosqan eleýli úlesi úshin Qasym-Jomart Toqaevty «Dýslyk» ordenimen marapattady.
