Prezıdentke Qaraǵandy oblysynyń 2023 jylǵy áleýmettik-ekonomıkalyq damý qorytyndysy týraly esep berildi, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaevqa byltyr 11 aıdyń ishinde óńirdegi ónerkásip óniminiń kólemi 3,1 trıllıon teńgeni quraǵany jóninde baıandaldy. Negizgi kapıtalǵa salynǵan ınvestısıa 16,3 paıyzǵa artyp, 727 mıllıard teńgege jetken.
Oblys ákiminiń aıtýynsha, óńdeý ónerkásibi salalarynda, atap aıtqanda, mashına jasaý isinde 45 paıyz, jeńil ónerkásipte 23,9 paıyz, farmasevtıkada 20 paıyz ósimge qol jetkizilgen. Sonymen qatar qaǵaz ónerkásibinde, qurylys ındýstrıasy men qara metalýrgıada ósim baıqalady.
Shaǵyn jáne orta bıznes salasynda 100 myńnan astam kompanıa qyzmet etedi jáne bul baǵytta óńirdegi belsendi halyqtyń 45 paıyzy jumys isteıdi. Kásipkerler úshin bólshek salyqtyń mólsheri 4 paıyzdan 2 paıyzǵa deıin tómendetildi. Bıyl jalpy óńirlik ónimdegi shaǵyn jáne orta bıznestiń úlesin 19 paıyzdan 25 paıyzǵa arttyrý josparlanyp otyr.
Oblys ákiminiń aıtýynsha, ekonomıkanyń barlyq salasynda 25 myńnan astam jumys orny ashylyp, jumyssyzdyq deńgeıi 4,1 paıyzǵa, kedeılik deńgeıi 2,7 paıyzǵa deıin tómendegen. Al halyqtyń naqty tabysy 4,7 paıyzǵa kóbeıgen.
Budan bólek, Prezıdentke jylytý maýsymynyń barysy, Qarmet kásipornyndaǵy qazirgi jaǵdaı týraly baıandaldy. Memleket basshysyna jańa ınvestordyń óndiristi turaqtandyrý jáne onyń kólemin arttyrý baǵytynda qabyldap jatqan sharalary, sondaı-aq óndiristi jańǵyrtý jáne kompanıa jumysshylarynyń eńbek qaýipsizdigin qamtamasyz etý jospary jóninde málimet berildi.
Áleýmettik sala boıynsha aýyldyq jerlerde 92 densaýlyq saqtaý nysanynyń qurylysy, eki aýdanaralyq aýrýhanany jańǵyrtý jumystary bastalǵan. Bıyl «Jaıly mektep» jobasy aıasynda óńirde 7100 oryndyq 10 mektep paıdalanýǵa berilmek.
Sonymen birge Ermaǵanbet Bólekpaev áleýmettik salanyń jaı-kúıi, «Aýyl – el besigi» jáne «Aýyl amanaty» jobalarynyń iske asyrylýy týraly da baıandady.
Kezdesý sońynda Qasym-Jomart Toqaev oblysty odan ári damytý jáne turǵyndardyń ál-aýqatyn jaqsartý jóninde birqatar tapsyrma berdi. Sondaı-aq Memleket basshysy Qarmet kompanıasyna qarasty nysandardaǵy jaǵdaıdy erekshe baqylaýǵa alý qajet ekenin atap ótti.