Zań jobasy áli qabyldanǵan joq. Mamandar qujatty sheteldik tájirıbelerge súıene otyryp qolǵa alǵan.
Elimizde jetim jáne ata-ana qamqorlyǵynsyz qalǵan balalar tolyq memlekettiń qorǵaýynda.
Biraq ınternat, balalar úılerinen góri otbasynda tárbıe alýdyń tıimdiligin tájirıbe kórsetip otyr. Pavlodar oblysynda jetim jáne ata-ana qamqorlyǵynsyz qalǵan 1 myń 535 bala bar, dep habarlaıdy Almaty-akshamy.kz 24.kz-ke silteme jasap.
Bes júzge jýyǵy memlekettik mekemelerde tárbıelenip jatsa, jetpis eki bala patronattyq otbastarynda turady. Balalarǵa 10, ata-analaryna 35 aılyq eseptik kórsetkish mólsherinde tólem qarastyrylǵan.
«Buryn úsh forma boldy. Ol qamqorshylyq, patronattyq tárbıe jáne asyrap alýshy. Endi jańa forma engizilip jatyr.Balalar úılerimen salystyrǵanda kásibı patronattyq otbasynda ómir súrý áldeqaıda yńǵaıly bolady dep oılaımyn. Sebebi bul otbasy arnaıy daıyndyqtan ótken. Al qıyn jaǵdaıǵa tap bolǵan búldirshinder memlekettik mekemelerge emes birden kásibı patronattyq otbastaryna tabystalady. Balanyń mártebesi anyqtalǵanǵa deıin birneshe aı boıy jańa ata-anasymen turyp, sol ýaqyt aralyǵynda beıimdelip úlgiredi», - deıdi QR Parlamenti Májilisiniń depýtaty Vera Kım.