Prezıdent jattyǵý júıeleri, bıikke órmeleý qabyrǵalary jáne oqý ortalyǵynyń mýltımedıalyq myltyq atý polıgonyn aralady.
Memleket basshysy–Qazaqstan Qarýly Kúshteriniń Joǵarǵy Bas qolbasshysy «Qaısar-2021» oqý-jattyǵýyna bardy, dep habarlaıdy Almaty-akshamy.kz Aqorda saıtyna silteme jasap.
Qasym-Jomart Toqaev Qazaqstan Respýblıkasy İshki ister mınıstrligi Ulttyq ulan qurylymynyń Almaty oblysyndaǵy Jaýyngerlik jáne ádistemelik daıyndyq ortalyǵynda ótken «Qaısar-2021» jedel-taktıkalyq oqý-jattyǵýlaryna bardy.
Memleket basshysyna arnaıy jasaq qyzmetkerleriniń qoıan-qoltyq urysqa daıyndyǵy kórsetildi. Prezıdent jattyǵý júıeleri, bıikke órmeleý qabyrǵalary jáne oqý ortalyǵynyń mýltımedıalyq myltyq atý polıgonyn aralady.
Joǵarǵy Bas qolbasshy áskerıler aldynda sóılegen sózinde Qazaqstannyń myqty memleket bolyp qalyptasýyna quqyq qorǵaý organdary eleýli úles qosyp jatqanyn atap ótti.
– Sizderdiń qajyrly eńbekterińizdiń arqasynda elimizde qoǵamdyq qaýipsizdik berik ornyqty. Qylmyspen kúresip, azamattardyń alańsyz tirshiligin qamtamasyz etý – táýekeli kóp jumys. Tártip saqshysy kez-kelgen ýaqytta qaterdiń betin qaıtarýǵa daıyn turýǵa tıis. Bul zor jaýapkershilik pen tózimdilikti talap etedi. Polısıa qyzmetkerleri qashanda qyraǵy ári shıraq bolýy kerek. Sondyqtan, osyndaı oqý-jattyǵýlar kásibı sheberlikti shyńdaý úshin óte mańyzdy, – dedi Qasym-Jomart Toqaev.
Prezıdent quqyq qorǵaý organdarynda qyzmet etý fızıkalyq jáne psıhologıalyq qysymǵa ushyratady, tipti, keıde jeke ómirine de qaýipti ekenine toqtaldy.
– Táýelsizdik jyldarynda ishki ister organdary men Ulttyq ulannyń áskerı qyzmetshileri qatarynan, barlyǵy 802 azamat qyzmettik mindetterin oryndaý barysynda qaza tapty. Olar ómiriniń sońyna deıin antyna adal boldy. Erlerdiń esimi máńgi umytylmaıdy. Janqıarlyǵy men batyrlyǵy úshin 1567 qyzmetker ordendermen jáne medaldarmen marapattaldy, – dedi Memleket basshysy.
Joǵarǵy Bas qolbasshy quqyq qorǵaý organdary salasyndaǵy shtattyq qyzmetkerlerdiń áleýmettik jaǵdaıyn jaqsartý máselesine toqtaldy.
– Aldaǵy úsh jylda ishki ister organdary qyzmetkerleriniń laýzymdyq eńbekaqysy orta eseppen 30 paıyzǵa ósedi. Osy maqsatqa jumsaýǵa 100 mıllıard teńgeden astam qarjy qarastyrylǵan. Ulttyq ulan sarbazdarynyń aılyq jalaqysy birtindep ósip keledi. 2021-2023 jyldary ofıserlerdiń jalaqysy 70 paıyzǵa, kelisimshart boıynsha qyzmet etetin áskerılerdiń eńbekaqysy 60 paıyzǵa jýyq artady. 2024 jyldyń sońyna deıin arnaıy kúshterde qyzmet etetinder men kelisimshart boıynsha qyzmet artqaryp júrgenderdiń bári ofıser shenin alady. Jyl saıyn turǵyn úıge qomaqty qarajat jumsalyp keledi. Qazirgi kezde 24 myń polısıa qyzmetkeri men 13,5 myńnan astam áskerı qyzmetshige turǵyn úı tólemderi berilip turady. Qoǵamdyq tártip pen qaýipsizdikti kúzetetin qyzmetkerlerge jan-jaqty áleýmettik qoldaý kórsetý bizdiń memleketimizdiń basymdyqtarynyń biri bolyp qala beredi, – dedi Qazaqstan Prezıdenti.
Qasym-Jomart Toqaev búgingi jedel-taktıkalyq jattyǵýlarǵa baǵa bere kele, İshki ister mınıstrligi túrli daǵdarystardyń aldyn alýǵa jáne jolyn kesýge tas túıin daıyn ekenderin kórsetti dedi. Memleket basshysy osy jetistiktermen toqtap qalýǵa bolmaıtynyn, halyqaralyq ozyq tájirıbeni muqıat zerdelep, otandyq mamandardy daıyndaý júıesin dáıekti túrde jetildirý qajet ekenine toqtaldy.
– Halyqaralyq ahýaldyń shıelenisýi jaǵdaıynda bizdiń kúshtik qurylymdar meıilinshe utqyr bolýǵa tıis. Aýǵanstandaǵy jaǵdaıǵa baılanysty qoǵamda alańdaýshylyq artyp kele jatqanyn kórip otyrmyz. Bul oqıǵalar Qazaqstanǵa tikeleı qaýip tóndirmeıdi. Alaıda belgili bir dárejede qateri bar. Sondyqtan biz jaǵdaıdy muqıat baqylap, kez kelgen syn-qaterge laıyqty jaýap berýge daıyn bolýymyz kerek, – dedi Joǵarǵy Bas qolbasshy.
Qasym-Jomart Toqaev kúshtik qurylymdar qyzmetkerleriniń aldynda sóılegen sózinde jas urpaqtyń solarǵa qarap boı túzeıtinin eskertti.
– Barshańyz tártip saqshysy degen abyroıly atqa laıyq bolýlaryńyz kerek. Sizderge beriletin eń joǵary baǵa – halyqtyń senimi men alǵysy. İshki ister organdarynyń qyzmetkerleri osy senimdi aqtaıdy dep senemin, – dedi Memleket basshysy.
Joǵarǵy Bas qolbasshyǵa İshki ister mınıstri Erlan Turǵymbaev vedomstvo qyzmetkerleriniń qoǵamdyq qaýipsizdikti qamtamasyz etý boıynsha tapsyrmalardy oryndaýǵa daıyndyǵy týraly baıandap, arnaıy, áskerı tehnıkalar men qarý-jaraqtardyń úlgilerin kórsetti.