Kezdesý barysynda Prezıdent ana men bala densaýlyǵyn saqtaý salasy memleketimizdiń basty basymdyǵy sanalatynyn atap ótti.
Qasym-Jomart Toqaev otandyq densaýlyq saqtaý júıesiniń aldynda júkti áıelder men balalarǵa medısınalyq kómektiń qoljetimdiligin ári sapasyn arttyrý, ana men bala ólimin azaıtý, balalardyń múgedektigin erte anyqtaý jáne aldyn alý jóninde mańyzdy mindetter turǵanyn aıtty, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy perzenthanalardyń ınfraqurylymyn nyǵaıtý jáne olardyń jumysyna ozyq standarttar men ádistemelerdi engizý qajettigine erekshe nazar aýdardy.
Gúlnar Nurlanova Perınatologıa jáne balalar kardıohırýrgıasy ortalyǵynyń qyzmeti men jetistikteri jáne júzege asyrylyp jatqan jobalary týraly málimet berdi. Sondaı-aq Ortalyq elimizdegi týa bitken júrek aýrýlary bar naýqastardy baqylaýdyń tolyq sıkli júrgiziletin jalǵyz mekeme ekenin jetkizdi. Munda jyl saıyn 200 kardıohırýrgıalyq ota jasalady. Perzenthanada dúnıege keletin náresteler sany 9000-ǵa, onyń ishinde merziminen buryn týǵandar shamamen 3700-ge jetedi.
Sonymen qatar Prezıdentke fetaldi hırýrgıaǵa qatysty revolúsıalyq joba engizile bastaǵany jóninde baıandaldy. Medısınalyq kómektiń atalǵan baǵytyna sáıkes, týa bitken damý kemistikterin korreksıalaý úshin balaǵa qursaq ishinde jatqanda operasıa jasalady. Joba deni saý balany dúnıege ákelip, ana baqytyna bólenýge múmkindik beredi.
Qasym-Jomart Toqaev dárigerlerdi qoldaý máselelerine arnaıy toqtalyp, olardyń qoǵam úshin sińirip jatqan eńbegi mańyzdy ekenin atap ótti. Prezıdent bıyl medısına qyzmetkerleriniń múddesin qorǵaýǵa jáne dáriger qyzmetiniń mártebesin arttyrýǵa baǵyttalǵan zańǵa qol qoıǵanyn eske saldy. Sonymen qatar alǵash ret «Qazaqstannyń eńbek sińirgen dárigeri» memlekettik nagradasy bekitildi.
Kezdesý sońynda Qasym-Jomart Toqaev Gúlnar Nurlanovaǵa jáne barlyq dárigerlerdiń ıgilikti jumysyna tabys tiledi.