Qasym-Jomart Toqaev D.Serikbaev atyndaǵy Shyǵys Qazaqstan tehnıkalyq ýnıversıtetine baryp, joǵary oqý ornynyń qyzmetimen tanysty jáne onyń bazasynda qurylǵan «Lý Ban sheberhanasy» oqý ortalyǵyn aralap kórdi, dep habarlaıdy almaty-akshamy.kz.
Prezıdentke bilim oshaǵynyń ǵylymı-ınnovasıalyq ekojúıesi týraly málimet berildi. Rektor Sáýle Rahmetýllınanyń aıtýynsha, byltyr ýnıversıtet bazasynda Smart engineering quzyretter ortalyǵy ashylǵan. Ortalyq mashına jasaý, taý-ken jáne metalýrgıa kesheni salalaryndaǵy ımportty almastyrýshy tehnologıalardy damytýdy kózdeıdi.
Memleket basshysyna jastardyń ınovasıalyq jobalar jasaýyna múmkindik beretin medısına baǵytyndaǵy tehnoparktiń negizin qalaý jospary jóninde baıandaldy. Qazirdiń ózinde ýnıversıtette ázirlengen 40-tan astam medısınalyq ımplantat túri klınıkalyq synyqtan ótkizilip jatyr.
Qazaq-nemis ýnıversıtetimen birlesip, metalýrgıa, paıdaly qazbalardy ıgerý baǵytynda Ǵylym jáne tehnologıa ınstıtýtyn ashý josparlanǵan.
«Lý Ban sheberhanasy» «Avtomobılderdiń ınovasıalyq konstrýksıasy» jáne «Avtomobılderdiń SMART tehnologıasy» sıaqty eki zerthanadan turady. Ortalyqtyń bir ereksheligi – munda stýdentter praktıkalyq daǵdylardy meńgerip, avtomobıl júıelerine sımýlásıalyq synaq júrgize alady. Sondaı-aq ortalyqta elektromobılder men gıbrıdti kólikterge tehnıkalyq qyzmet kórsetý jáne dıagnostıka jasaý úshin jańa tehnologıalardy ıgerý isine aıryqsha mán beriledi.
Memleket basshysy jol qozǵalysyn ıntellektýaldy turǵyda uıymdastyrýǵa arnalǵan SMART-ústelmen tanysty.
Prezıdentke gıbrıdti avtomobılderdi, elektromobılderdi jáne olardy qýattaý prınsıpterin úırenýge arnalǵan oqý stendteri kórsetildi.
Elimizde «Lý Ban sheberhanalaryn» ashý bastamasyn byltyr mamyr aıynda Sıanda ótken «Ortalyq Azıa – Qytaı» samıtinde Prezıdent Qasym-Jomart Toqaev pen QHR Tóraǵasy Sı Szınpın kótergen bolatyn.
Ýnıversıtet maqsattarynyń biri – osy «Lý Ban sheberhanasy» bazasynda otandyq avtomobıl qurastyrý ónerkásibi úshin joǵary bilikti tehnıkalyq jáne ınjenerlik kadrlardy daıarlaý.
Ortalyqty aralap kórgen Prezıdent stýdenttermen áńgimelesip, olarǵa tabys tiledi. Sondaı-aq ekonomıkany damytý úshin elimizde «Lý Ban sheberhanasy» sıaqty ortalyqtardyń sanyn kóbeıtý mańyzdy ekenin atap ótti.