Prezıdentke Májilistiń VII shaqyrylymynyń ekinshi sesıasynda atqarylǵan zań shyǵarý jumystary týraly málimet berildi. Parlamenttiń tómengi palatasynyń spıkeri qabyldanǵan birqatar zańnyń Memleket basshysy usynǵan reformalardy zańnamalyq turǵydan qamtamasyz etýge baǵyttalǵanyn atap ótti, dep habarlaıdy Almaty-akshamy.kz.
Erlan Qoshanovtyń aıtýynsha, qazirgi ýaqytta depýtattar halyqpen kezdesýler ótkizip, jergilikti jerlerdegi ahýalmen tanysý úshin óńirlerge attanǵan. Olar azamattardyń kótergen mańyzdy degen problemalaryn zerttep, júıeleıdi. Sodan keıin Úkimetpen birlesip bul máselelerdi sheshetin bolady.
Májilis tóraǵasy Prezıdentke Parlamenttiń tómengi palatasy jumysynyń jańa formaty, sonyń ishinde Qoǵamdyq palata qurý jóninde aıtty.
Budan bólek, Erlan Qoshanov Qasym-Jomart Toqaevqa AMANAT partıasynyń qoǵamdaǵy áleýmettik ádildikti qamtamasyz etýge jáne azamattardyń ál-aýqatyn arttyrýǵa baǵyttalǵan jumystary týraly baıandady. «Jer amanaty» jobasy aıasynda paıdalanylmaıtyn jáne aýyl sharýashylyǵy maqsatyndaǵy zańsyz berilgen jerlerdi memleket menshigine qaıtarý jumystary júrgizilip jatyr.
Partıa Úkimetpen birlesip, «Aýyl amanaty» jobasyn júzege asyrýda. Aýyl turǵyndary bólshek saýda jelisiniń talaptary men tutynýshylardyń suranysyn eskere otyryp, aýyl sharýashylyǵy ónimderin óndirý jónindegi jańa quzyretterdi úırenedi. Osy rette turǵyndar sany 7,7 mıllıon adam bolatyn 2400 aýyldyq okrýgti qamtý josparlanyp otyr.
Sonymen birge Májilis tóraǵasy Memleket basshysyna 23-24 maýsym aralyǵynda Cholpon-Ata qalasynda ótken Túrki tildes memleketterdiń Parlamenttik Assambleıasynyń XI plenarlyq otyrysyna qatysqan Qazaqstan delegasıasy jumysynyń qorytyndysy týraly baıandady.