Meshittiń jalpy syıymdylyǵy – 1000 oryn.
Almaty oblysy Talǵar aýdanyna qarasty Qyzyltý aýylynda jańadan meshit ashylyp, el ıgiligine berildi, dep habarlaıdy Almaty-akshamy.kz QMDB baspasóz qyzmetine silteme jasap.
Igi rásimge QMDB Tóraǵasynyń orynbasary, naıb múftı Kenjeáli Qońyratbaıuly, Almaty oblysynyń bas ımamy Qýanysh Baqytbekuly jáne aýyl turǵyndary, din janashyrlary qatysty. Jamaǵatqa Bas múftı Naýryzbaı qajy Taǵanulynyń qasıetti zulhıjja aıynyń quttyqtaýy men sálemin jetkizgen naıb múftı:
«Meshit – musylmannyń Jaratýshysyna qulshylyq jasap, táýbege keler, janyna jara salǵan, hakim Abaı aıtqandaı «qıametshil dúnıeniń» kirinen tazaryp, bar arman, úmitiniń aqtalýyn tilep, duǵa jasaıtyn qadirli úıi. Al, meshittiń qabyrǵasynan dinı ýaǵyz tyńdap, bilimin jetildirip, saýatymdy arttyramyn, ustazdan tálim alamyn degen musylmandar úshin – tárbıe ordasy» dedi.
Aýyl halqyn aýyzbirshilik pen yntymaqqa shaqyryp, isterine sáttilik pen bereke tiledi. Sondaı-aq Kenjeáli Qońyratbaıuly Alla úıine Quran Kárim jáne arnaıy syılyqty jańa ımamǵa tartý etip, meshit salǵan kásipker azamattarǵa alǵys aıtyp, qurmet kórsetip, kópshilikke aq batasyn berdi. Budan keıin jamaǵat jańa meshitte «Zulhıjja aıynyń alǵashqy on kúniniń artyqshylyǵy» taqyrybynda ýaǵyz tyńdap, alǵashqy juma namazyn ótkizdi.
Aıta keteıik, Qyzyltý aýylynyń «Moldahmet» meshiti 2009-2012 jyly turǵyndardyń kómegimen salynyp, qoldanysqa berilse, 2020 jyly apatty jaǵdaıǵa baılanysty súrilip, kásipker Talǵat Orynbasarulynyń demeýshiligimen qaıta boı kóterdi. «Ibrahim Khalil Alla» ataýy berilgen meshittiń jalpy syıymdylyǵy – 1000 oryn. Dárisqana men dárethana, kólik turaǵy jáne balalarǵa arnalǵan sport alańqaıymen qamtylǵan.