Áńgimelesý barysynda Qasym-Jomart Toqaev pen Pak Chjın ekijaqty strategıalyq seriktestiktiń qazirgi jaı-kúıi men damý perspektıvalary jóninde pikir almasty. Memleket basshysy Qazaqstan men Koreıa arasyndaǵy saýda, ınvestısıa jáne tehnologıa salalaryndaǵy ózara qarym-qatynastardyń, sondaı-aq mádenı-gýmanıtarlyq baılanystardyń qarqyndy damyp kele jatqanyn atap ótti, dep habarlaıdy Almaty-akshamy.kz.
– Ózderińizge málim, Koreıa biz úshin Azıadaǵy negizgi seriktesterdiń biri retinde óte mańyzdy. Ekijaqty yntymaqtastyq baǵytyndaǵy barlyq jetistikti joǵary baǵalaımyz. Sonymen qatar ekijaqty saýda kólemi 6 mıllıard dollardan asqanyna óte qýanyshtymyn. Degenmen bizde mol múmkindik bar. Ony bolashaqta paıdalaný qajet. Sondyqtan sizdiń bul saparyńyz – ózekti halyqaralyq máseleler jóninde ózara pikir almasý úshin jaqsy múmkindik. Qazaqstan men Koreıanyń negizgi halyqaralyq máseleler boıynsha ustanymdary ortaq. Halyqaralyq arenada da, ekijaqty formatta da bizdi jaqyndata túsetin kóptegen ortaq isterimiz bar dep senemin, – dedi Memleket basshysy.
Memleket basshysy KIA avtomobıl óndirisin, Hyundai zaýytynyń jumysyn, feroqorytpa jáne bolat óndirisin, «Aqyldy ferma» jobasyn jáne basqa da bastamalardy mysalǵa keltirdi. Prezıdent elderimiz arasynda ekijaqty qarym-qatynastyń berik ınstıtýttyq jelisi qalyptasqanyna nazar aýdardy. Saýda-ekonomıkalyq, ǵylymı-tehnıkalyq yntymaqtastyq jónindegi qazaq-koreı úkimetaralyq komısıasy men İskerlik keńes osy baılanystarǵa dáneker bolyp otyr. Bul rette Memleket basshysy atalǵan qurylymdardyń áleýetin tolyq paıdalanýǵa shaqyrdy.