Eki el delegasıalarynyń qatysýymen ótken kelissóz barysynda Qasym-Jomart Toqaev Prezıdent Iýn Sok Óldiń Qazaqstanǵa jasaǵan alǵashqy memlekettik saparyn tarıhı oqıǵa dep baǵalady, dep habarlaıdy almaty-akshamy.kz.
Sondaı-aq búgingi kelissózder qazaq-koreı yqpaldastyǵynyń aıasyn keńeıtip, ekijaqty baılanysty jańa beleske kóteretinin aıtty. Bizdiń Prezıdenttiń pikirinshe, Ońtústik Koreıa jahandyq aýqymdaǵy naǵyz ekonomıkalyq jáne tehnologıalyq lokomotıvke aınaldy. Al álemge áıgili koreı korporasıalary halyqaralyq arenada eldiń «negizgi jahandyq memleket» retindegi pozısıasyn ilgeriletýge eleýli úles qosyp keledi. Budan bólek, taraptar mádenı-gýmanıtarlyq baılanystardy damytý máselesine nazar aýdardy.
– Qazaqstanda turatyn 120 myń etnıkalyq koreı ultynyń ókilderi eki el arasyndaǵy qatynastardy nyǵaıtýda mańyzdy ról atqarady jáne oǵan ólsheýsiz úles qosady. Óz kezeginde Koreıada bilim alyp jatqan myńnan astam qazaqstandyq jastar memleketter arasyndaǵy «dostyqtyń altyn kópiri» sanalady, – dedi Memleket basshysy.