Memleket basshysy Konstıtýsıalyq Sot tóraǵasy Elvıra Azımovany qabyldady
Kezdesýde Prezıdentke joǵary konstıtýsıalyq baqylaý organynyń qyzmeti týraly málimet berildi, dep habarlaıdy almaty-akshamy.kz
Memleket basshysyna byltyr Konstıtýsıalyq Sotqa bes myńnan astam ótinish, onyń 99 paıyzy azamattardan kelip túskeni jóninde baıandaldy. Elvıra Azımovanyń aıtýynsha, azamattar óz ótinishterinde sot aktilerine, laýazymdy tulǵalar men sýdıalardyń is-áreketteriniń zańdylyǵyna, qylmystyq jazanyń túrleri men sharttaryna, qylmystyq qýdalaý kezinde adam quqyqtarynyń saqtalýyna, eńbek jáne ákimshilik-quqyqtyq qatynastarda quqyqtyń qorǵalýyna qatysty máselelerdi kótergen.
Konstıtýsıalyq sottary bar memleketterdiń bárine tán negizgi ustanym – azamattardyń konstıtýsıalyq sot tóreligine júginýin shektemeý jáne qarjylyq kedergilerdi alyp tastaý. Osyǵan oraı Memleket basshysy byltyr jeltoqsan aıynda Konstıtýsıalyq Sotqa júgingen kezde tóleıtin memlekettik baj salyǵyn nóldik mólsherlemege deıin tómendetýdi qarastyratyn zańǵa qol qoıdy.
Sonymen qatar Qasym-Jomart Toqaevqa konstıtýsıalyq is júrgizý aıasynda azamattarǵa kepildi zań kómegin berý sharttary, sondaı-aq quqyqtyq monıtorıń pen zań shyǵarý qyzmeti sheńberinde Konstıtýsıalyq Sot qabyldaǵan sheshimderdi jáne sot praktıkasynyń sholýyn eskerý týraly usynystar qazirgi ýaqytta Parlament Májilisiniń qaraýynda jatqany baıandaldy.
Memleket basshysyna berilgen málimetke sáıkes byltyr 558 quqyq normasy tekserilip, nátıjesinde 29 normatıvtik-quqyqtyq aktige ózgerister engizý jóninde keńes berildi. Konstıtýsıalyq Sot Qylmystyq-prosessýaldyq, Salyq kodeksteriniń jáne birqatar zańnyń jekelegen normalaryn qaıta qaraý jóninde usynystaryn berdi. Búginde Úkimet pen ýákiletti organdar atalǵan usynymdardyń 16 paıyzdan astamyn oryndady.
Prezıdent Konstıtýsıalyq Sottyń 2023 jyly atqarǵan jumystarynyń qorytyndysyn baǵalaı otyryp, atalǵan organnyń qurylýy jáne onyń qyzmeti Qazaqstan Respýblıkasy Konstıtýsıasynyń múltiksiz saqtalýyn qamtamasyz etýge, adam men azamattardyń quqyqtaryn, bostandyǵyn qorǵaýǵa qatysty qoǵam men memlekettiń suranysyna saı keletinin aıtty.