Qasym-Jomart Toqaev Joǵarǵy sot tóraǵasynyń elimizdegi sot tóreliginiń qazirgi ahýaly týraly baıandamasyn tyńdady.
Jaqyp Asanov qylmystyq proseste aýyr jáne asa aýyr qylmystar boıynsha aqtaý úkimderiniń sany 7 ese artqanyn jetkizdi. Quqyq qorǵaý organdary qamaýǵa alýǵa qatysty árbir besinshi iske sanksıa ala almaǵan, dep habarlaıdy Almaty-akshamy.kz BORT N1 Telegram kanalyna silteme jasap.
Árbir úshinshi shaǵym boıynsha sottar tergeýshiler men prokýrorlardyń áreketterin zańsyz dep tanyǵan.
Prezıdentke azamattyq daýlar boıynsha jumys tásiliniń ózgergeni baıandaldy. Sottar ákimdiktermen birlesip, daýlardy sheshýdiń sottan tys ınstıtýttaryn damytyp keledi. Daýsyz talap aryzdar notarıýstarǵa berilgen jáne arbıtrajdardyń, medıatorlardyń, zań konsýltanttary men eńbek ınspektorlarynyń quzyretteri keńeıtilgen. Nátıjesinde, 4 jyl ishinde sotqa túsetin talap aryzdar sany 2,5 esege – 900 myńnan 340 myńǵa deıin azaıǵan. Sottaǵy tatýlasýmen aıaqtalǵan ister 37 paıyzǵa deıin artty.
Bıyl 1 tamyzdan bastap aýmaqaralyq sottylyq engizildi. İster avtomatty túrde sýdıalardyń mamandanýyn eskere otyryp, bir sottyń ishinde emes, búkil el aýmaǵyndaǵy sottardyń arasynda bólinedi. Jaqyp Asanovtyń aıtýynsha, bul – jemqorlyqqa qarsy jańa ádis.
Memleket basshysy qylmystyq jáne azamattyq ister boıynsha sot prosesteriniń sapasyn arttyrýǵa, sondaı-aq sot kadrlaryn irikteýdi jetildirýge baǵyttalǵan qadamdar qajet ekenin atap ótti.