Prezıdentke 2024 jyldyń qańtar-shilde aılarynda qysqa merzimdi ekonomıkalyq ındıkator 112,4 paıyzdy quraǵany baıandaldy, dep habarlaıdy aqshamnews.kz.
Oblysqa 188,2 mıllıard teńge ınvestısıa tartyldy, sonyń ishinde jeke ınvestısıanyń mólsheri 136,7 mıllıard teńgege jetti.
Beıbit Isabaevtyń aıtýynsha, aımaq ekonomıkasynyń agrarlyq salaǵa negizdelgenin eskere otyryp, paıdalanylmaǵan jerlerdi qaıtarý jáne aınalymǵa engizý sharalaryna, «Aýyl amanaty» baǵdarlamasyn júzege asyrý, qant óndirisin damytý máselelerine basa mán berilgen.
Memleket basshysyna ónerkásip óndirisin órkendetý, óńirge ınvestısıa tartý jaıynda málimet berildi. Atap aıtqanda, birqatar perspektıvti ınvestısıalyq joba iske asyrylyp jatyr. Olardyń qatarynda Kerbulaq aýdanyndaǵy metalýrgıa kombınaty, «Qorǵas – Shyǵys qaqpasy» arnaıy ekonomıkalyq aımaǵyndaǵy «Qazaqstan-Qytaı halyqaralyq ónerkásip qalasy» ındýstrıaldy parki, Jońǵar qaqpasy aýmaǵyndaǵy qýaty 1 GVt bolatyn jel elektr stansıasy sıaqty iri jobalar bar. Óńirdiń kólik-logıstıkalyq jáne tranzıttik áleýetin arttyrý úshin júıeli jumystar qolǵa alynǵan.
Qasym-Jomart Toqaevqa turǵyn úı-kommýnaldyq sharýashylyq salasynyń jaı-kúıi týraly aıtyldy. Oblys ákiminiń sózinshe, jyl sońyna deıin óńirdi gazben qamtý deńgeıi 56,5 paıyzǵa jetedi. 2028 jylǵa qaraı Jetisý oblysy kógildir otynmen tolyq qamtylady dep kútilip otyr. Sońǵy 2 jylda oblysta 86 áleýmettik ınfraqurylym nysany salynyp, jóndeýden ótken.
Prezıdentke turǵyn úı jáne jol qurylysy, týrızmdi damytý jaıynda aqparat berildi. Jalpy Jetisýdyń týrısik baǵyty Alakól, Balqash kólderi, «Altynemel», «Jońǵar Alataýy» ulttyq parkteri, Jońǵar Alataýynyń taý massıvteri sekildi halyq jıi baratyn oryndardyń áleýetine ıek artady. Ekologıalyq týrızmdi damytý maqsatynda Burhanbulaq sarqyramasy men Jasylkólge aparatyn jol salý josparlanǵan.
Kezdesý sońynda Memleket basshysy óńirdi áleýmettik-ekonomıkalyq turǵydan damytý jáne halyqtyń ál-aýqatyn jaqsartý baǵytyndaǵy jumystardy odan ári jalǵastyrýdy tapsyrdy.