Almatylyq dárigerler ómir boıy týabitti jambas kemistiginiń zardabyn tartyp kelgen jas kelinshekke biregeı ota jasady.
Almatydaǵy №7 Qalalyq klınıkalyq aýrýhananyń dárigerleri jambastyń týabitti aqaýynyń saldarynan múgedek atanǵan 28 jastaǵy kelinshekke kúrdeli ota jasap, onyń kóp jyldar boıy janyn aýyrtqan aýrýdan arylýyna múmkindik berdi, dep habarlaıdy aýrýhananyń baspasóz qyzmeti.
Naýqas týabitti dısplazıa, jambas býynynyń damymaýy jáne jambastyń joǵarǵy jaǵynyń shyǵyp ketýi sıaqty dıagnozdarmen ómir súrgen. Osy kemistikterdiń nátıjesinde onyń bir aıaǵy ekinshisinen 10 sm qysqa bolyp, ómir boıy aıaǵyn syltyp basqan. Sońǵy jyldary naýqastyń tize býyndary, jilinshigi aýyryp, aıaqtary qozǵalý qabiletin joǵalta bastaǵan. Sonymen qatar, jambasy qısaıyp, belinde aýyrsyný paıda bolǵan.
Jetinshi aýrýhananyń travmatolog-ortoped dárigerleri konsılıým ótkizip, ota jasaý týraly sheshim qabyldady.
«Biz súıek osin retteý úshin osteotomıa ádisin qoldandyq. Pasıenttiń aıaǵyn sozyp, zamanaýı sheteldik endoprotez ornatyldy. 28 jyl boıy osy kemistikpen ómir súrgen naýqas operasıadan keıingi ekinshi kúni-aq aıaǵyna turyp, arnaıy qurylǵynyń kómegimen júre bastady. Pasıentterdiń ómirge qulshynysy artyp, kóńil-kúıi jaqsarǵanyn kórý biz úshin úlken qýanysh», - dedi Polıjaraqat bólimshesiniń meńgerýshisi Ramazan Askerov.
Dárigerdiń aıtýynsha, bul óte kúrdeli operasıa boldy. Operasıa barysynda býyn men júıke júıesiniń zaqymdaný qaýpi bolǵan, sondaı-aq aıaqty sozý kezinde quıymshaq nervteriniń qysylý jáne býyndardyń úzilý qaýpi de týyndaǵan. Mundaı joǵary dáldikti talap etetin kúrdeli hırýrgıalyq operasıalar sırek jasalady, deıdi maman.
Barlyǵy 5 saǵatqa sozylǵan biregeı ota mindetti áleýmettik medısınalyq saqtandyrý (MÁMS) júıesi arqyly jasaldy.